Në Ukrainën lindore sot vazhduan luftimet intensive mes trupave qeveritare dhe forcave të separatiste pro-ruse, ndërsa ushtria ukrainase tha se qindra trupa ruse kaluan kufirin për t’u ardhur në ndihmë rebelëve.
Ushtria tha se kishte marrë kontrollin e aeroportit të debatueshëm të Donetskut, pasi i nxorën jashtë rebelët, të cilët u tërhoqën për në zonat e banuara të qytetit.
Udhëheqësi i rebelëve, Denis Pushilin, u citua të ketë thënë mbrëmë se forcat rebele në aeroport i kishin zmbrapsur sulmet e trupave qeveritare dhe kishin marrë përsëri kontrollin e tij.
Ndërkohë, zëdhënësi i ushtrisë ukrainase tha se rreth 700 trupa ruse hynë sot në Ukrainë, për t’u ardhur në ndihmë forcave rebele.