Lidhje

Tirana dënon vrasjen e Ivanoviçit


Në Shqipëri autoritetet më të larta shtetërore e politike të vendit dënuan sot ashpër vrasjen në Kosovë të politikanit lokal serb Oliver Ivanoviç, duke theksuar se ngjarja nuk duhet të ndikojë në dialogun mes Prishtinës dhe Beogradit

Presidenti Ilir Meta foli për një akt kriminal, për të cilin ai tha se ka besim se autoritetet do ta zbardhin sa më parë. Ai bëri thirrje “për vlerësimin e situatës me qetësi e maturi dhe që ky akt kriminal të mos ndikojë në procesin e rëndësishëm të dialogut midis Serbisë dhe Kosovës, proces i cili është shumë i rëndësishëm për të ardhmen evropiane të të dy vendeve dhe për stabilitetin, paqen dhe sigurinë e rajonit”.

Përmes një postimi në Facebook, kryeministri Edi Rama shprehu “keqardhje të thellë për tragjedinë e Oliver Ivanoviçit”, që sipas tij është “një akt qëllimkeq që nxit urrejtje e tension”. Edhe zoti Rama thekson se “përpjekjet për dialogun e paqen s’duhen ndalur” dhe se madje ato “duhen thelluar”. Këtij aspekti i mëshon dhe ministri i Jashtëm shqiptar Ditmir Bushati, i cili në Twitter shkruan se “vrasja e Oliver Ivanoviç është një goditje e tmerrshme ndaj dialogut, pajtimit dhe stabilitetit në Kosovë. Të gjithë aktorët duhet të qëndrojnë të qetë dhe të lejojnë që drejtësia të veprojë shpejt!”

Edhe kryetari i Partisë Demokratike Lulzim Basha e cilësoi vrasjen “një akt të pastër kriminal”, i cili sipas tij “përveçse një atentat ndaj jetës, synon të jetë një atentat ndaj proçeseve të bashkëjetesës e të dialogut në Kosovë. Trajtimi i ngjarjeve të tilla – nënvizon në deklaratën e tij zoti Basha - kërkon maturi dhe largpamësi nga çdo aktor i përfshirë në dialogun dhe proçesin e paqëtimit në Kosovë”.

Për vijimin e dialogut mes Kosovës dhe Serbisë bëri thirrje dhe kryetarja e LSI, Monika Kryemadhi. “Pavarësisht kësaj ngjarje të rëndë, dialogu Kosovë- Serbi duhet të vazhdojë. Politika duhet të dijë ta tejkalojë këtë situatë në emër të integrimit evropian”, u shpreh zonja Kryemadhi.

Facebook Forum

XS
SM
MD
LG