Tetë shtete amerikane dhe kryeqyteti Uashington, po hedhin në gjyq administratën e Presidentit Trump për lejimin e një personi nga Teksasi që të publikojë detaje se si mund të prodhohen armë zjarri me printim tredimensional. Akt-padia thotë se lejimi i njerëzve që të prodhojnë vetë armë plastike bie ndesh me kontrollet e shteteve ndaj armëve të zjarrit.
Teknologjia në fjalë do të mundësonte këdo që të prodhojë armë zjarri, madje në shtëpi. Akt-akuzën e drejton Bob Ferguson Prokuror i Përgjithshëm i shtetit Uashington.
“Akt-akuza është depozituar në gjykata ndërsa kemi mësuar se organizata në fjalë – “Defense Distributed” – planifikon të publikojë të mërkurën në internet programe të shkarkueshme për prodhimin e armëve me printim 3D. Synojmë ta bllokojmë këtë në mbarë vendin,” tha Prokurori.
Programet e krijuara nga një kompani në Teksas lejojnë këdo me një printer tredimensional që të ndërtojë pjesë për një armë plastike që do të kushtonte disa qindra dollarë.
Departamenti i Shtetit i kishte dhënë urdhër mbështetësit për të drejtat e armëve, Cody Wilson, që të ndalonte publikimin e programeve me argumentin se kjo bie ndesh me ligjet amerikane për eksportin. Cody Wilson paditi urdhërin nën pretendimet se shkel të drejtat e tij kushtetuese dhe administrata u tërhoq.
Facebook Forum