Nënpresidenti amerikan, Mike Pence ndodhet në Singapor për takime rajonale të nivelit të lartë, gjatë të cilit ai do të theksojë angazhimin e administratës së Presidentit Trump, për ta mbajtur rajonin e Indo-Paqësorit të lirë dhe të hapur, por ku udhëheqësit do të shohin me kujdes se çfarë do të ofrojë ai konkretisht, si nga pikëpamja e sigurisë ashtu edhe nga ajo e tregëtisë dhe investimeve.
Një zyrtar i lartë i administratës u tha gazetarëve se vizita e nënpresidentit në rajon do të shërbejë për të shpallur "nisma konkrete dhe të rëndësishme" për të vënë në jetë strategjinë që u shpalos nga President Donald Trump në takimin e nivelit të lartë të Shoqatës së Vendeve të Azisë Juglindore, APEC-ut, në Vietnam, vitin e kaluar.
Një nga çështjet kryesore në takimin e Singaporit do të jetë edhe përplasja tregëtare mes Uashingtonit dhe Pekinit, që i ka bërë nervozë vendet e rajonit. Ndërkohë shumë pyetje mbeten lidhur me angazhimin e sigurisë në rajon nga ana e administratës amerikane, kryesisht lidhur me Korenë e Veriut.
Para se të shkonte në Singapor, nënpresidenti Pence ishte në Tokio ku tha se një marrëveshje dypalëshe tregëtare me Japoninë, do të ishte rruga më e mirë për të zgjidhur imbalancën tregëtare që Uashingtoni thotë se I ka vënë prodhimet amerikane në dizavantazh.
Facebook Forum