Në Tiranë, presidenti Ilir Meta, vlerësoi të martën, ish ambasadorin amerikan Alexander A. Arvizu me Titullin “Për Merita të Veçanta Civile”. Ky Titull ju dha me motivacionin: “Në vlerësim të veprimtarisë diplomatike dhe kontributit të tij të çmuar në përparimin e gjithanshëm të marrëdhënieve dypalëshe gjatë mandatit të tij si Ambasador i Shteteve të Bashkuara të Amerikës por edhe në vijim si dhe për mbështetjen e pakursyer të procesit të integrimit euro-atlantik të vendit”.
Në fjalën e tij gjatë ceremonisë së organizuar në mjediset e presidencës, zoti Meta vui theksin te marrëdhëniet e veçanta mes Shqipërisë dhe Shteteve të Bashkuara. “SHBA-të kanë pasur dhe vazhdojnë te kenë një rol vendimtar dhe një rëndësi vitale në historinë e shtetit shqiptar që prej krijimit të tij, për çka Shqipëria dhe shqiptarët do të jenë gjithmonë mirënjohës. Në këtë kontekst vendoset edhe kontributi i Ambasadorit Arvizu gjatë, por edhe pas shërbimit të tij diplomatik në Shqipëri”.
Zoti Meta, duke vënë në dukje rolin e ambasadorit Arvizu në përparimin e marrëdhënieve dypalësh, kujtoi vizitën në Tiranë të Sekretares të Shtetit, Hillari Klinton dhe fjalën e saj në Parlamentin Shqiptar për 100-vjetorin e Pavarësisë së Shqipërisë. Presidenti Meta tha gjithashtu se “Ambasador Arvizu ka një meritë të veçantë për mbështetjen e pakursyer të procesit të integrimit euro-atlantik të vendit si dhe për ndihmën efikase në përparimin e reformave kyçe, përfshirë luftën kundër krimit të organizuar, por edhe reformën në drejtësi. Për reformën në drejtësi, që ka qenë kryefjala e viteve të fundit shtoi zoti Meta - do të theksoja në veçanti angazhimin e Tij jo shumë të dukshëm, por mjaft aktiv në detyrën e Zv.Ndihmës Sekretarit të Shtetit për çështjet e drejtësisë dhe të luftës kundër drogës. Duke sugjeruar gjithmonë bashkëpunim dhe konsensus mes të gjitha palëve për realizimin e kësaj reforme madhore edhe gjatë dy vizitave të tij të kryera në Shqipëri”.
Ambasadori Arvizu shërbeu në Shqipëri nga Dhjetori i viti 2010 deri në Janar të vitit 2015.
Facebook Forum