Në Australi u arrestuan gjashtë persona, pas një operacioni të përbashkët me Shtetet e Bashkuara, që rezultoi në kapjen më të madhe ndonjëherë të metamfetaminës në Shtetet e Bashkuara.
Agjencia amerikane për Doganat dhe Mbrojtjen Kufitare njoftoi se 1,728 kilogramë drogë ishin fshehur në kuti metalike të etiketuara sikur mbanin altoparlantë, kur u konfiskuan nga autoritetet muajin e kaluar në portin e Long Beach, së bashku me sasi të vogla kokaine e heroine.
Të premten autoritetet australiane thanë se operacioni i përbashkët amerikano-australian ndaloi atë që u quajt "një cunami prej akulli" që të hynte në Australi.
Policia Federale Australiane tha se të dyshuarit të cilët u arrestuan të enjten, përfshirë dy amerikanë, janë të lidhur me një organizatë me bazë në SHBA që ndodhet nën hetim për trafik droge.