Të premten në Shtetet e Bashkuara numri i të prekurve me COVID-19 e ka kaluar shifrën prej 670 mijë personash ndërsa 33 mijë të tjerë kanë humbur jetën si pasojë e virusit.
Të premten media shtetërore kineze njoftoi se rreth 1.300 persona që kanë vdekur nga koronavirusi në qytetin kinez të Wuhanit, ose gjysma e totalit të raportuar, nuk janë llogaritur në numrin e përgjithshëm të vdekjeve për shkak të gabimeve në llogaritje. Pekini hodhi poshtë pretendimet se pas kësaj fshiheshin arsye për të mbuluar numrin e vërtetë të viktimave.
Wuhani, qyteti ku shpërtheu për herë të parë virusi në fund të vitit të kaluar, i shtoi 1.290 viktima të tjera shifrës prej 2,579 personash të vdekur si pasojë e virusit të llogaritur deri ditën e enjte. Një grup pune i ngritur nga qeveria lokale, ngarkuar me kontrollin e situatës njoftoi si arsye për këtë, raportimin e gabuar vonesat apo lënien jashtë. Duke reflektuar vdekjet shtesë në Wuhan, Kina rishikoi numrin e saj kombëtar të vdekjeve gjatë ditës së premte që u rrit në 4,632.
Rishikimi i shifrave pason spekulime të përhapura në shkallë të gjerë se numri i të vdekurve në Wuhan ishte dukshëm më i lartë se sa ishte raportuar. Zërat për më shumë viktimave u nxitën për javë të tëra nga fotot e radhëve të gjata të familjarëve në pritje për të mbledhur hirin e të afërmve të tyre si dhe njoftimet për mijëra vazo mbushura me hirin e të tjerë viktimave grumbulluar në një shtëpi funerali. Dyshimet se Kina nuk ka qenë transparente lidhur me shpërthimin janë rritur ditët e fundit ndërsa numri i vdekjeve vazhdon të rritet në shumë vende, përfshirë Shtetet e Bashkuara.
Presidentin Donald Trump u shpreh të mërkurën skeptik për shifrën e vdekjeve të deklaruar më parë nga Kina prej rreth 3,000 vetësh.
Ministria kineze e Punëve të Jashtme Kinës tha sot se rishikimi i shifrës së vdekjeve si pasojë e koronavirusit ishte një çështje me përgjegjësi historike dhe publike, duke hedhur poshtë pretendimet se kishte patur ndonjë përpjekje për të mbuluar të vërtetën.