Në një film që nisi të shfaqet në ekran të mërkurën, Papa Françesku thotë se personat e së njëjtës gjini duhet të mbrohen nga ligjet e bashkimit civil, deklarata më e qartë që ai ka bërë deri tani mbi të drejtat e homoseksualëve.
"Njerëzit homoseksualë kanë të drejtë të jetojnë në një familje. Ata janë fëmijët e Zotit dhe kanë të drejtë për familje. Askush nuk duhet të braktiset ose të vuajë për shkak të kësaj”, thotë ai në dokumentarin "Francesco" të regjisorit Evgeny Afineevsky, dikur i emëruar për Çmimin Oskar.
"Ajo që duhet të krijojmë është një ligj i bashkimit civil. Në këtë mënyrë ata do të jenë të justifikuar ligjërisht. Unë jam ngritur në mbrojtje të kësaj", shprehet ai.
Papa duket se po i referohej rastit kur ishte kryepeshkop i Buenos Airesit dhe kundërshtoi legjislacionin pro martesave mes personave të së njëjtës gjini, por mbështeti një lloj mbrojtjeje ligjore për të drejtat e çifteve homoseksuale.
Biografi Austen Ivereigh i tha agjencisë së lajmeve Reuters se komentet e Papës në film janë ndër deklaratat e tij më të qarta për këtë temë që nga zgjedhja e tij në vitin 2013.
Në fillim të papatit të tij, Papa Françesku bëri komentin e tij tashmë të njohur "Kush jam unë që të gjykoj”, duke iu referuar homoseksualëve që përpiqen të bëjnë një jetë të krishterë.
Facebook Forum