Lojtarët janë ulur në gjunjë, kanë shpalosur parulla dhe kanë kërkuar veprime më të ashpra e megjithatë racizmi në futboll - mjedisi i tyre i punës - mbetet i përhapur.
Por tani mund të ketë ardhur pika kulmore ndërsa lojtarët elitë në Paris ndërmarrin hapin e jashtëzakonshëm të refuzojnë të luajnë.
Në fund të një viti me gjeste të rëndësishme kundër padrejtësisë racore dhe diskriminimit, Liga e Kampionëve demonstroi një nga shfaqjet më të fuqishme të solidaritetit kundër racizmit në futboll të martën kur lojtarët e ekipit Saint-Germain të Parisit dhe Basaksehir të Stambollit, dolën nga fusha dhe nuk u rikthyen më.
"Braktisja e lojës nga të dyja ekipet, Basaksehir dhe PSG shënon një kthesë në Evropë," i agjencisë Associated Press, Piara Powar, drejtori ekzekutiv i rrjetit Fare për anti-diskriminimin.
"Shumë lojtarë janë të lodhur me masa gjysmake kundër racizmit dhe janë më të gatshëm se kurrë për të ushtruar të drejtën e tyre për të ndalur një ndeshje."
Pika e vlimit erdhi 14 minuta pas fillimit të lojës kur zyrtari i katërt - Sebastian Coltescu i Rumanisë - u akuzua për përdorimin e një shprehjeje raciste për të identifikuar ndihmës-trajnerin Basaksehirit, Pierre Webo para se ta dënonte për sjellje të papërshtatshme. Webo është me ngjyrë.
"Jeni racist," i tha trajneri i Basaksehir Okan Buruk, Coltescut. Webo i indinjuar kërkoi një shpjegim nga Coltescu, duke përsëritur të paktën gjashtë herë:
"Pse thua ‘negro’?" Shkëmbimet u transmetuan drejtpërdrejt në botë nga fusha e futbollit e Ligës më të madhe të klubeve.
"Pse kur përmend një lojtar me ngyrë, duhet të thuash 'Ky djalë i zi?", pyeti lojtari rezervë i Basaksehir Demba Ba, i cili është me ngjyrë.
Rrjeti Fare ndihmon UEFA-n të dënojë akte diskriminuese si incidenti i së martës në Parc des Princes.
"Kolegët tanë në organizatën shtetërore rumune kundër diskriminimit kanë konfirmuar se është raciste në Rumanisht t'i referohet një lojtari duke përdorur racën e tij si mënyrë identifikuese," tha zoti Powar.
"Nuk ka asnjë paqartësi. Ky incident tregon nevojën për trajnim shumë më të mirë të zyrtarëve të ndeshjeve. Racizmi i paqëllimtë është gjithsesi racizëm."
Racizmi në lojërat e futbollit zakonisht ka ardhur nga tribunat, por ndeshjet në vende të tilla si Franca po luhen pa tifozë për shkak të pandemisë COVID-19.
Incidentet e profilit të lartë kanë prirjen të nxjerrin në pah masat e papërshtatshme, si në kampionatin portugez në shkurt.
Sulmuesi i Portos, Moussa Marega u përpoq të largohej nga fusha pasi I bë objekt i abuzimeve raciste nga tifozët në një lojë kundër Guimarães dhe kërkoi të zëvendësohej. Por ai u përball me përpjekje nga vetë lojtarët e ekipit të tij dhe atij kundërshtar për ta bindur atë që të mos largohej nga fusha.
Arbitri pastaj i dha Maregas një karton të verdhë pasi refuzoi të vazhdonte lojën – një masë që i frenon lojtarët të largohen.
Arbitri rumun që drejtonte lojën në Paris të martën - Ovidiu Hategan - ishte në të njëjtën pozitë në ndeshjen e Ligës së Kampionëve në vitin 2013 kur lojtari i Manchester City-t, Yaya Toure u ankua për mungesë reagimi ndaj tingujve të imitimit të majmunëve që ai dëgjoi nga tifozët e ekipit CSKA të Moskës.
"Nëse zyrtarët nuk vendosin standard të larta me sjelljen e tyre, "tha zoti Powar," nuk mund të presësh që ata ta kundërshtojnë racizmin në fushë ose në tribuna. "
Arbitrat shpesh janë kritikuar se nuk i kanë udhëzuar lojtarët të dalin nga fusha, por ia kanë lënë atyre në dorë vendimin.
Ekipi kombëtar i Anglisë vendosi të vazhdojë të luajë një lojë në Malin e Zi vitin e kaluar Callum Hudson-Odoit dhe Danny Rose u vunë në shënjestër me tinguj që imitonin majmunët.
Loja e Ligës së Kampionëve në Paris do të rifillojë të mërkurën me një ekip të ri arbitrash.
"Dalja e lojtarëve nga fusha është një hap në drejtimin e duhur, "tha ish-mbrojtësi i Manchester United, Rio Ferdinand në televizionin britanik BT Sport.
"Por nuk mund t'u lihet vetëm atyre."
Facebook Forum