Përfaqësuesi i posaçëm i Departamentit amerikan të Shtetit për Ballkanin, Gabriel Escobar në vizitën e tij të parë në Maqedoininë e Veriut theksoi mbështetjen e fuqishme të vendit të tij për procesin integrues të Maqedonisë së Veriut drejt Bashkimit Evropian; ndërsa tha se Shtetet e Bashkuara po punojnë me partnerët e tyre evropianë për t’u siguruar që kjo të ndodhë shumë shpejt. Zoti Escobar falenderoi autoritetet në Shkup për angazhimin e vendit të tyre dhe mbështetjen ndaj NATO-s.
Në një konferencë shtypi me Ministrin e Jashtëm, Bujar Osmani, zyrtari amerikan nënvizoi nevojën e fleksibilitetit dhe të reformave të vazhdueshme që integrimi të realizohet.
“Maqedonia e Veriut është pjesë e Evropës; kulturalisht dhe historikisht është pjesë e Evropës si dhe ekonomikisht - pjesë e Ervropës. Ju duhet të keni një vend në tryezën e Bashkimit Evropian”, u shpreh zyrtari amerikan.
Ministri i jashtëm Osmani theksoi se “SHBA janë partneri ynë strategjik; aleat i afërt në NATO dhe përkrahës më i madh i yni që nga pavarësia e deri më sot”.
Ministri Bujar Osmani tha se tani është momenti që BE-ja të fillojë bisedimet me Maqedoninë e Veriut dhe se kjo do të ishte një konfirmim i madh për vendin që të mbetet i përkushtuar për realizimin e reformave demokratike dhe për të përshpejtuar integrimin në BE.
Kryediplomati Osmani përshëndeti hyrjen e kompanisë amerikane Bechtel për ndërtimin e një segmenti të rëndësishëm të korridorit tetë në Maqedoninë e Veriut.
“Shpresoj se interesimi i investitorëve amerikanë për vendin tonë do të vazhdojë të rritet, duke pasur parasysh kushtet e favorshme që ofron Maqedonia e Veriut për të bërë biznes”, tha ministri.
Në takim është biseduar edhe për rolin e Maqedonisë së Veriut në OSBE dhe NATO që do të ndihmonte në zgjidhjen e çëshjtjeve sfiduese në aleancë dhe në rajon, tha zoti Escobar.
Zëvendës-ndihmës Sekretari amerikan i Shtetit për çështjet e Evropës dhe Euroazisë u prit nga zyrtarët më të lartë shtetërorë në Shkup, të cilët i kanë theksuar atij, mes tjerash se zhbllokimi i procesit të integrimit evropian të vendit do të reflektohet në mënyrë pozitive ndaj qëndrueshmërisë së përgjithshme dhe zhvillimit të rajonit.
Facebook Forum