Ka kaluar pothuajse një vit që kur mbështetësit e ish Presidentit Donald Trump sulmuan Kapitolin në Shtetet e Bashkuara, në një përpjekje të dështuar për të përmbysur humbjen e tij në zgjedhjet presidenciale. Ky është sulmi më i rëndë ndaj simbolit të demokracisë amerikane, që nga lufta e vitit 1812. Katër persona humbën jetën në ditën e trazirave. Rreth 140 policë u plagosën gjatë sulmit prej disa orësh të mbështetësve të Trumpit, ndërsa që nga ajo ditë, katër oficerë kanë kryer vetëvrasje.