Ndërsa pandemia ka ndërprerë disa herë mënyrën tradicionale të mësimdhënies nëpër auditore, disa mësues po përdorin alternativa të tjera për t’i mbajtur studentët të angazhuar. Korrespondentja e Zërit të Amerikës Tina Trinh ishte në Universitetin e Konektikatit dhe vizitoi një klasë që zhvillohet pjesërisht përmes realitetit virtual.
Kur Chinedu Nkwo ("chuh-NAY-doo OON-kwah") vendosi të regjistrohej në një klasë sipërmarrjeje në Universitetin e Konektikatit, atij iu desh të mësonte se si të ecte. . . duke mbajtur në sy një pajisje të realitetit virtual.
“M’u desh kohë për të mësuar si ta përdor pajisjen. Si mund të lëviz, rrotullohem apo ngjis shkallët.”
Klasa e tij përdor pajisjen Oculus për seanca të shkurtra të realitetit virtual.
Pedagogia Tara Watrous ("TAR-uh WAH-truss") thotë për Zërin e Amerikës se ideja për të përdorur realitetin virtual lindi gjatë pandemisë, pasi ajo dhe kolegët e saj u përballën me sfidat e mësimdhënies në internet.
“Në shumë raste studentët dilnin nga rrjeti Zoom apo mbyllnin mikrofonat. Mësimdhënia ishte e vështirë në ato kushte.”
“Në hapësirën virtuale është e pamundur të shpërqendrohesh dhe të heqësh kufjet, sepse del jashtë klasës”, thotë për Zërin e Amerikës studentja Kripa Marvadi.
Pajisja Oculus, e prodhuar nga kompania Facebook e cila vihet në sy, ka një teknologji kaq të përparuar saqë të jep ndjesinë e vendndodhjes së individit që flet dhe pozicionin e përdoruesit brenda mjedisit virtual.
Studentët thonë se kjo metodë arsimi përmes realitetit virtual është më tërheqëse. Por nuk është e qartë nëse kjo teknologji ndihmon tek arsimimi. Instuktorja Watrous thotë se teknologjia ndihmon.
“Ekspozimi ndaj mundësive të ndryshme është një pjesë shumë e rëndësishme për studentët. Duhet të ekspozohen ndaj një shumëllojshmërie të gjerë kulturash dhe problemesh.”
Eksperti David Noble thotë se realiteti virtual mund të nxisë ide të reja.
“Përdorimi i teknologjisë në jetën e përditshme të studentëve, veçanërisht teknologjinë në zhvillim, bën që ata të fillojnë të imagjinojnë zgjidhjet duke përdorur atë teknologji”.
“Ky është rasti i parë që u ekspozova ndaj realitetit virtual. Aktualisht po përdorim realitetin virtual në një projekt ripërshtatjeje të një hapësire tregtare”, thotë për Zërin e Amerikës studentja Sabrina Uva.
Për këta studentë, ajo që është "virtuale" sot, përfundimisht mund të bëhet pjesë e botës reale nesër.