Lidhje

Të paktën 10 të plagosur me armë zjarri nga sulmi në metronë e Nju Jorkut


Personeli i shërbimeve të emergjencave në hyrje të stacionit të metrosë në Bruklin, Nju Jork (12 prill 2022)
Personeli i shërbimeve të emergjencave në hyrje të stacionit të metrosë në Bruklin, Nju Jork (12 prill 2022)

Një incident me armë zjarri përfshiu metronë e Bruklinit në Nju Jork sot në mëngjes në një orë piku të lëvizjes së udhëtarëve. Autori i dyshuar i sulmit qëlloi të paktën 10 persona dhe 6 të tjerë u plagosën. Pesë nga të goditurit me armë ishin në gjendje të rëndë, por nën kontroll mjekësor, ndërsa disa nga të plagosurit u lënduan nga copëza të shkaktuara nga plumbat dhe objekte të tjera. Shumë pasagjerë u rrëzuan në tokë nga paniku i njerëzve që përpiqeshin të largoheshin. Policia njoftoi se ishte vënë në kërkim të një furgoni me targa të shtetit Arizona dhe se më vonë një mjet i tillë u gjet i parkuar po në Bruklin. Shefi i policisë James Essig njoftoi se mjeti ishte marrë me qera në emër të Frank R. James, 62 vjeç, dhe se nuk dihet ende nëse qeramarrësi ka lidhje me sulmin.

Në këtë foto të marrë nga Will B Wylde, një person ndihmohet jashtë një vagoni treni në lagjen Bruklin të Nju Jorkut, e martë, 12 prill 2022
Në këtë foto të marrë nga Will B Wylde, një person ndihmohet jashtë një vagoni treni në lagjen Bruklin të Nju Jorkut, e martë, 12 prill 2022

Përpara se të qëllonte personi i armatosur hodhi tym në metro. Policia vazhdon të jetë në kërkim të tij. Autoritetet thanë se asnjë person nuk ndodhej në rrezik për jetën dhe se sulmi nuk po hetohet si terrorizëm, por pa e përjashtuar si mundësi. Zyrtarët thanë gjithashtu se të paktën 16 persona janë plagosur në një mënyrë a një tjetër gjatë sulmit në stacionin e metrosë në lagjen Sunset Park.

Sipas burimeve të shumta të organeve të zbatimit të ligjit në dijeni të hetimeve, informacionet paraprake tregojnë se personi i armatosur që u largua nga vendngjarja, ishte i veshur me një jelek nga ato që përdorin punonjësit e ndërtimit dhe kishte vendosur një maskë anti-gaz.

Personeli i policisë së Nju Jorkut në vendgjarje (12 prill 2022)
Personeli i policisë së Nju Jorkut në vendgjarje (12 prill 2022)

Fillimisht autoritetet po hetonin rreth njoftimeve për shpërthime në vendngjarje, por policia tha rreth mesditës se nuk ishte në dijeni të ndonjë pajisjeje shpërthyese. Zëdhënësi i kryebashkiakut, Fabien Levy, tha se në vendngjarje u gjetën pajisje të shumta tymuese.

Për ngjarjen u informuan Presidenti Joe Biden, Nënpresidentja Kamala Harris dhe Prokurori i Përgjithshëm Merrick Garland. Kryebashkiaku i Nju Jorkut, Eric Adams, i cili gjendet në karantinë pas një testi pozitiv për COVID-19 të dielën, tha në një deklaratë të filmuar se qyteti "nuk do të lejojë që njujorkezët të terrorizohen, qoftë edhe nga një individ i vetëm".

Incidenti ndodhi në një linjë metroje që përshkon Bruklinin jugor në një lagje ku gjenden kryesisht komunitete hispanike dhe aziatike dhe nga ku duhen vetëm rreth 15 minuta udhëtim me tren për në Manhatan. Shkollat lokale, përfshirë shkollën e mesme Sunset Park përballë stacionit, u mbyllën.

Qyteti i Nju Jorkut është përballur me një seri sulmesh me armë dhe incidente gjatë muajve të fundit, përfshirë edhe në sistemin e metrosë së qytetit.

XS
SM
MD
LG