Presidenti Joe Biden ka autorizuar lëshimin e të dhënave shtesë nga koha e presidencës së Donald Trumpit, për komisionin e Kongresit që po heton sulmin e vitit të kaluar ndaj Kapitolit, sipas një letre zyrtare që u bë publike të mërkurën.
Në letër, kreu i Arkivës Kombëtare David Ferriero, tha se zoti Biden nuk kishte pranuar të përdorte një kompetencë presidencial të njohur si privilegj ekzekutiv për t’i mbajtur konfidenciale të dhënat e zotit Trump.
Letra është në përputhje me deklaratat e mëparshme të presidentit Biden se është në interesin e vendit që Kongresi të ketë qasje tek të dhënat e Shtëpisë së Bardhë gjatë kohës së presidencës Trump në lidhje me ngjarjet e 6 janarit 2021.
Në letrën e Ferrieros thuhej se Arkivi Kombëtar i Shteteve të Bashkuara do t'ia dorëzojë komisionit të dhënat më 28 prill.
Arkiva Kombëtare, një agjenci federale ku ruhen të dhënat presidenciale, i ka dorëzuar tashmë qindra faqe dokumentesh Komisionit të Dhomës së Përfaqësuesve që heton sulmin e 6 janarit 2021.
Ish-presidenti Trump dhe aleatët e tij janë përpjekur të bllokojnë qasjen tek dokumentet dhe dëshmitarët. Zoti Trump ka kërkuar që të pëdorë privilegjin ekzekutiv, i cili mban konfidenciale disa komunikime të brendshme të Shtëpisë së Bardhë.
Gjykata e Lartë e Shteteve të Bashkuara refuzoi në janar një kërkesë të zotit Trump për të bllokuar lëshimin e një numri të dhënash të Shtëpisë së Bardhë të kërkuar nga komisioni i Kongresit.
Vetëm një nga nëntë anëtarët e gjykatës, gjyqtari konservator Clarence Thomas, vuri në dukje publikisht mosmarrëveshje me vendimin.
Komiteti i Përzgjedhur ka thënë se i duhen të dhënat për të kuptuar çdo rol që Trump mund të ketë luajtur në nxitjen e dhunës që u shpalos më 6 janar 2021. Mbështetësit e tij sulmuan Kapitolin në një përpjekje të dështuar për të parandaluar Kongresin që të certifikonte zgjedhjet presidenciale të Bidenit në 2020 fitore zgjedhore ndaj Trump.