Në Shqipëri u mbajt sot një ditë zi kombëtare në nderim të ish presidentit Bujar Nishani, i cili u nda nga jeta fundjavën e kaluar.
Në ceremonitë mortore, të mbajtura në presidencë, morën pjesë politikanë, diplomatë e udhëheqës të njohur shtetërorë nga Shqipëria, Kosova, Maqedonia e Veriut dhe Mali i Zi.
Ish presidenti i Shqipërisë, Bujar Nishani, u përcoll sot me nderime nga presidenca në varrezat publike të kryeqytetit pas ceremonive zyrtare, ku morën pjesë përfaqësues të lartë parlamentarë, shtetërorë e diplomatikë të Shqipërisë, Kosovës, Maqedonisë së Veriut, Malit të Zi.
Në ceremonialin e nderimit morën pjesë ambasadorja e SHBA-ve në Shqipëri, Yuri Kim, si dhe diplomatë të shteteve aleate perëndimore.
Kryetarja e parlamentit, Lindita Nikolla, anëtarë të grupeve parlamentare, anëtarë të qeverisë shprehën ngushëllimet e tyre familjarëve të zotit Nishani gjatë ceremonive në sallën kryesore të selisë së presidencës, ku familja dhe të afërmit e tij kanë pritur vizita.
“Bashkë me kolegë, ministra dhe deputetë, jemi sot në institucionin e presidentit të Republikës për t’i dhënë lamtumirën e fundit një shtetari të respektuar si Bujar Nishani. Gjatë ushtrimit të detyrës si president i Republikës, presidenti Nishani tregoi në momentet e duhura vlerësimin maksimal për Kushtetutën dhe respektin ndaj institucioneve” - tha Taulant Balla, kryetar i grupit parlamentar të Partisë Socialiste.
Në ceremonitë nderuese mori pjesë e shoqëruar nga shumë politikanë të Prishtinës edhe presidentja e Kosovës, Vjosa Osmani, politikanë të njohur nga Shkupi e Podgorica si dhe ish presidentë të Shqipërisë në mandate të kaluara.
Nderime të vecanta shënuan politikanë të opozitës, prej nga zoti Nishani nisi karrierën e tij politike dhe ku ishte për disa vite president nderi në forumet e larta drejtuese të Partisë Demokratike.
“Ikja nga kjo botë e njerëzve si Bujar Nishani është ikja e një copëze historie për cilindo që e kanë njohur dhe që bashkëpunuar me të. Bashkë me të ikën edhe një copëz historie e një burri të urtë e të qetë, që lëshonte vetëm sinjale paqeje dhe mirësie. Këto sinjale janë të pakta në botën tonë të trazuar dhe kjo e bën edhe më të madhe dhimbjen dhe humbjen e zotit Nishani” - tha Enkelejd Alibeaj, kryetar i grupit parlamentar të Partisë Demokratike.
Ceremoniali kulmoi me një fjalë nderimi nga Presidenti Ilir Meta, i cili tha se zoti Nishani ishte një nga politikanët dhe shtetarët më të përgjegjshëm dhe më seriozë në çdo detyrë politike dhe shtetërore, por si President i Republikës ai ishte një mbrojtës i shkëlqyer i Kushtetutës, i interesit publik dhe kombëtar, i demokracisë.
“I ardhur në politikë nga Forcat e Armatosura, Presidenti Nishani solli virtytet më të mira të ushtarakëve tanë në jetën politike dhe institucionale të vendit. Ai mishëroi integritetin, ndjenjën e lartë të detyrës dhe patriotizmin. Bujar Nishani e shihte politikën si artin e së mundshmes, dhe besonte se ajo ishte instrumenti më efektiv për të sjellë ndryshime pozitive. Bujar Nishani besonte te demokracia dhe shteti ligjor” - tha presidenti Meta.
Ish presidenti Nishani u nda nga jeta në një spital në Gjermani ku ai u shtrua për shkak të komplikacioneve post-Covid në mushkëri dhe ku po trajtohej për shkak të gjendjes së rënduar shëndetësore.
Zoti Nishani vuante prej kohësh nga një sëmundje auto-imune dhe gjendja e tij u rëndua nga pasojat e COVID-19.
Bujar Nishani shërbeu si president i Shqipërisë, teksa ishte 46 vjec, nga viti 2012 deri në vitin 2017.
Para se të zgjidhej president zoti Nishani ishte ministër i Mbrojtjes, ministër i Drejtësisë dhe ministër i Brendshëm.
Ai kishte kryer studimet e larta në Akademinë Ushtarake “Skënderbeu” në vitet e fundit të diktaturës komuniste, si dhe studimet pasuniversitare në Kaliforni të SHBA në vitin 1996, për t’ju kthyer studimeve të jurisprudencës në kryeqytetin shqiptar.