Në Shqipëri, Partia socialiste ka fituar zgjedhjet në tre bashki, atë të Elbasanit, Kamzës dhe Vorës, ku rezultati zyrtar, falë numërimit dhe votimit elektroni, u shpall me shpejtësi.
Në Elbasan, kandidati socialist Gentian Llatja, drejtuesi aktual i bashkisë, u rikonfirmua me 55 për qind, ose me një diferencë me mbi 4500 vota ndaj kandidatit të koalicionit opozitar “Bashkë Fitojmë”, Luçiano Boçi, ish-deputet i kësaj zone.
Socialistët kanë marrë 48 për qind të votave dhe për Këshillin bashkiak, ku falë aleatëve të saj e kalon me lehtësi 50% e nevojshëm për të marrë kontrollin e shumicës.
Koalicioni “Bashkë Fitojmë”, në të cilin është përfshirë pjesa e demokratëve që udhëhiqet nga ish-kryeministri Sali Berisha, së bashku me Partinë e Lirisë, ka marrë 23.89 për qind të votave, ndërkohë që Partia Demokratike e drejtuar nga Enkelejd Alibeaj, 12.93 për qind.
Fitore të thellë socialistët kanë rregjistruar në dy bashkitë e tjera të Vorës dhe Kamzës, ku veçanërisht kjo e fundit ka qenë tradicionalisht një bastion i së djathtës. Në Kamëz, kandidati socialist Rakip Suli ka grumbulluar 60.65 për qind të votave, ose 10 mijë më shumë se kandidati i koalicionit “Bashkë Fitojmë”, Bilbil Bajraktari, i cili nuk ka shkuar më shumë se 35 për qind. Në këtë Bashki, e djathta përfaqësohej dhe nga një kandidat i Partisë Demokratike, Arjan Hoxha, i cili ka marrë vetëm 4.24 për qind.
Akoma më e thellë, është fitorja e kandidatit socialist Blerim Shera në Vorë, një bashki e vogël e cila prej shumë vitesh është kontrolluar po ashtu nga të djathtët. Zoti Shera ka marrë 74.28 për qind, ose 8125 vota kundrejt 2813 mijë votash të grumbulluara nga kandidati i koalicionit “Bashkë Fitojmë”.
Ndërsa në pjesën tjetër të vendit pritet procesi i numërimit të votave, Kryeministri Edi Rama, njëkohësisht dhe kryetar i Partisë Socialiste, ka paralajmëruar, përmes një postimi në Facebook, një fitore të thellë, me të paktën 50 nga 61 Bashki të vendit.
Nga ana e tij, is-kryeministri Sali Berisha, kandidatët e të cilit ishin nën siglën e koalicionit “Bashkë Fitojmë” paralajmëroi mosnjohjen e rezultatit, të paktën në tre Bashkitë në të cilat socialistët janë shpallur fituesë.
“Të dhëna të besueshme dëshmojnë se Kamza është manipulim dixhital monstruoz, monstruoz”, deklaroi zoti Berisha, sipas të cilit demokratët në zgjedhjet e vitit 2021 ishin disa mijëra vota përpara socialistëve.
“Ndërkohë, manipulimi dixhital e nxjerr sot PS-në 10 mijë vota para këtij koalicioni. Ky është absolutisht një rezultat i gatuar në mënyrë dixhitale dhe hidhet poshtë me vendosmërinë më të madhe. Edhe njëherë them se rezultati i Kamzës, pasi u krahasuan rekordet elektorale dhe anketat, janë kryekëput të manipuluara”.
Ish-kryeministri shtoi se, “kur them për Kamzën, atëherë problemi dixhital është totalisht në diskutim dhe dyshim të plotë. Kemi indicie të tjera, sipas të cilave, sistemi është vendosur në kontrolle të dyfishta, por edhe njëherë janë për t’u verifikuar këto”.
Më herët, në një tjetër dalje publike zoti Berisha kishte deklaruar se,“unë kërkoj nga KQZ-ja që të bëjë auditim e këtyre aparaturave. Aty ky dyshohet se është devijuar rezultati, do kërkohet auditimi”. Ai shtoi se rezultati elektronik “quhet paraprak, sepse provohet gjithnjë fleta e votimit përkatëse”.
Zoti Berisha u shfaq optimist për rezultatin në zgjedhje. “Eshtë i sigurt pozitiv”, deklaroi ai duke i bërë thirrje komisionerëve “të mbikqyrin çdo votë aty ku janë”. Nga ana tjetër ai akuzoi kryeministrin për “blerje masive të votës”, dhe përdorimin, siç u shpreh, të bandave kriminale që kanë kërcënuar qytetarët.
Në krah të tij, në mbrëmje ishte dhe Salvator Kaçaj, një emër i njohur në zonën e Shëngjinit dhe Lezhës, i cili kishte mbështetur kandidatin e opozitës. Zoti Berisha tha se ndaj Kaçajt ishte tentuar një atentat, që sipas tij ishte urdhëruar nga kryetari aktual i Bashkisë së Lezhës, dhe kandidati socialist edhe në këtë garë, Pjerin Ndreu. Në disa komunikime me mediat, zoti Ndreu i hodhi poshtë si trillime akuzat ndaj tij.
Dita e votimit
Në zgjedhjet e sotme, u vu re një pjesmarrje e ulët në votime. Komisioneri shtetëror I zgjedhjeve, Ilirjan Celibashi deklaroi se shifrat në afro 90 përqind të qendrave të votimit flasin për një pjesmarrje në kuotat e 34.37 përqind, 12 pikë përqindje më poshtë se sa zgjedhjet e fundit politike të vitit 2021.
Procesi i sotëm, rregjistroi probleme të shumta me funksionimin e pajisjeve të instaluara për identifikimin elektronik të votuesve, në pjesë të ndryshme të vendit, përfshirë dhe Tiranën, ku pajisja nuk funksionoi as në qendrën ku votoi ish kryeministri Sali Berisha.
Komisioneri Celibashi dhe nënkomisionerja Lealba Pelinku, pasi kishin kaluar më shumë se 2 orë e gjysëm, nga nisja e procesit, u detyruan të urdhëronin që aty ku pajisja nuk funksionon “identifikimi të vijojë me mënyrën tradicionale”. Bëhet fjalë për mbi 500 nga 5.213 qendra votimi në të cilat identifikimi elektronik dështoi.
Megjithatë, sipas deklarimeve të zotit Celibashi pasdite, në “tërësi procesi i votimi ka shkuar normalisht. Mendoj se është tejkaluar problematika e identifikimit elektronik, sepse procesi vijon me mënyrën tradicionale. Mbetet për t’u verifikuar në 502 qendra votimi pse ka ndodhur kjo situatë, dhe jemi duke punuar për këtë. E rëndësishme është që në pjesën tjetër, procesi i identifikimit elektronik, po shkon shumë mirë”.
Nuk kanë munguar gjatë ditës denoncime për aspekte të ndryshme të procesit, që nga votimet familjare të prania e personave të paautorizuar pranë qendrave të votimit, por deri më tani, ato nuk duket të kenë qenë të përmasave që mund të vënë në pikëpyetje integritetin e votimit.
Teknologjia, këtë herë edhe për votimin dhe numërimin elektroni, po zbatohet në tre bashki, Elbasan, Kamëz dhe Vorë. Rezultatet paraprake pritet të publikohen menjëherë pas mbylljes së procesit. Numërimi në pjesën tjetër të vendit do të realizohet manualisht, në 92 qendra të numërimit të ngritura posaçërisht.
Në garë ishin 144 kandidatë nga 40 parti dhe koalicione, përfshirë dy kandidatë të pavarur. Ndërsa për 1603 pozicionet e anëtarit të Këshillave bashkiakë, konkuruan rreth 23 mijë e 700 kandidatë, përfshirë 10 të pavarur.
Zgjedhjet për pushtetin vendor u monitoruan nga misioni i vëzhguesve ndërkombëtarë të ODIHR-it, i kryesuar nga ambasadorja Audry Glover e cila sot ndoqi personalisht ecurinë e procesit në disa qendra votimi. Të shpërndarë në të gjithë vendin kanë 165 vëzhguesë afatshkurtër, krahas disa dhjetrave të tjerë nga organizata ndërkombëtare dhe ambasadat e huaja të akredituara në Shqipëri.
