Sekretari i Përgjithshëm i NATO-s, jens Stoltenberg u takua të mërkurën në Shkup me udhëheqësit e vendeve të Ballkanit Perëndimor, për të diskutuar mbi çështjet e sigurisë në rajon e më gjerë; luftën në Ukrainë dhe atë në Lindjen e Mesme, por dhe mbi tema të tjera. Zoti Stoltenberg bëri thirrje për vazhdimin e dialogut në mes Kosovës dhe Serbisë dhe për dhënien fund të tensioneve në rritje në Bosnjë e Hercegovinë. Ai tha se megjithatë, nuk shikon kërcënime ushtarake ndaj vendeve të Aleancës Veriatlantike dhe vendeve të rajonit.
Zoti Stoltenberg tha se rajoni i Ballkanit Perëndimor është me rëndësi strategjike për NATO-n dhe sipas tij ka arsye për shqetësim.
“Ne shohim kërcënime për ndarje në Bosnjë-Hercegovinë, një situatë të brishtë të sigurisë në Kosovë dhe ngecje të bisedimeve midis Beogradit dhe Prishtinës. Mbi të gjitha, shtetet autoritare, siç është Rusia synojnë të minojë demokracitë tona”, tha shefi i NATO-s.
“Stabiliteti në Ballkanin Perëndimor varet nga të gjitha palët që zgjedhin dialogun dhe diplomacinë në vend të konfliktit dhe kaosit”, theksoi më tej ai.
“Riangazhimi në dialogun e ndërmjetësuar nga BE-ja është thelbësor për rrugën e Beogradit dhe Prishtinës drejt paqes dhe mirëqenies. Propozimi i fundit për Asociacionin e Komunave me Shumicë Serbe mund të jetë një hap i rëndësishëm përpara. Është koha që të shmangen konfliktet që kanë zgjatur shumë kohë”, tha zoti Stoltenberg.
Kryeministri shqiptar Edi Rama ka propozuar një format të një takimi të nivelit të lartë të NATO-s me Ballkanin Perëndimor, ku do të jenë të pranishme jo vetëm anëtaret e Aleancës por edhe vendet partnere të saj.
Në konferencën e përbashkët për shtypin ai foli më shumë foli për Kosovën, ndërsa sulmin e fundit në veri të saj e konsideroi si një paralajmërim dhe jo një ngjarje sporadike...
“... e cila duhet me çdo kusht të mos përsëritet. Për këtë arsye theksova edhe sot në takim domosdoshmërinë e rritjes së numrit të forcave të NATO-s në Kosovë dhe domosdoshmërine për të garantuar kufirin në mes Kosovës dhe Serbisë, i cili faktikisht është jashtë kontrollit. Ne jemi të bindur që Kosova duhet të ndimohet që të përshpjetojë integrimin e saj në NATO. Dua ta falënderoj presidentin e Kroacisë, i cili në mënyrë të përsëritur i ka bërë jehonë këtij opinioni në të gjitha tryezat e NATOS-s dhe pa diskutim që unë ndaj me të bindjen absolute, që është absurde që Kosova të pengohet në këtë proces, ndërkohë që të gjithë së bashku në NATO jemi, jo vetëm të vëmendshëm, por edhe të angazhuar në Kosovë, aktualisht”, tha Kryeministri Rama.
Kryeministri Rama theksoi dhe synimet për shpejtimin e procedurave rreth ndërtimit të bazës së NATO-s në Porto Romano, sepse kjo do të ishte e rëndësishme sipas tij, për vlerën strategjike jo vetëm për Shqipërinë, por edhe për vetë NATO-n, e cila do të fitonte një qasje të shpejtë në këtë anë të Evropës për qëllimet e mbrojtjes së përbashkët.
Ai bëri të ditur se vendi i tij ka përmbushur me buxhetin e vitit 2024 qëllimin e financimit për mbrojtjen në 2 për qind, siç e kërkon NATO-ja, për të qenë në frontin e vendeve të Aleancës në të gjitha sfidat e përbashkëta.
Presidenti i Kroacisë, Zoran Milanoviç, duke iu përgjigjur një pyetjeje të gazetarëve për dëbimin e një diplomati kroat nga Serbia tha se kjo duket të jetë pjesë e fushatës parazgjedhore në vendin fqinj. “Mirë që ka zgjedhje në Serbi”, komentoi ai.
Kryeministri maqedonas, Dimitar Kovaçevski tha se qëndrueshmëria dhe siguria që ofron NATO-ja për vendin e tij dhe rajonin sjell edhe mirëqenie ekonomike, investitorë evropianë dhe amerikanë dhe standarde më të mira për qytetarët.
“Maqedonia e Veriut dhe vendet e rajonit meritojnë të jenë pjesë e Bashkimit Evropian”, tha ai, ndërsa shtoi se vendi ka kapacitet për t’i bërë ballë ndikimit rus dhe synimeve keqdashëse, ndërsa vendin e tij e shikon si një faktor stabiliteti në rajonin e Ballkanit.
Kryeministri malazez Milojko Spajiç theksoi përkushtimin e fuqishëm të qeverisë së tij për plotësimin e synimeve strategjike që janë: anëtarësimi i plotë në BE, zbatimi i politikave të NATO-s dhe zgjerimi i bashkëpunimit rajonal.
Sipas tij, gjendja e sigurisë në rajon kërkon një vigjilencë të vazhdueshme të BE-së dhe NATO-s, ndërsa tha se vendi i tij “ka 0 probleme me fqinjët”.
Në takim është diskutuar edhe për luftën brutale të Rusisë ndaj Ukrainës, siç tha kreu i Aleancës, teksa shtoi se nuk shikon shenja tek Putini për të negociuar apo ndalur luftën.
Ai u shprehu mirënjohje vendeve të rajonit për dhënien e mbështetjes jetike, siç tha, për Ukrainën.
Zoti Stoltenberg përsëriti se Aleanca nuk shikon një kërcënim të drejtpërdrejtë ushtarak ndaj vendeve anëtare dhe ndaj rajonit. Ai e cilësoi Maqedoninë e Veriut si një vend të suksesshëm në më shumë fusha, “përfshirë të qenurit një shoqëri e suksesshme shumetnike që i dëshmon rajonit dhe më gjerë se njerëz me origjinë të ndryshme mund të bashkëjetojnë në mënyrë paqësore”. “Dhe një vend aleat i vlerësuar lart”, u shpreh ai.
