Ushtria izraelite njoftoi se një sulm ajror vrau një komandant të Hezbollahut në Liban të dielën ndërsa udhëtonte me një automjet. Zyrtarët thanë se goditja ajrore eliminoi Ismail Al-Zin, komandant i njësisë së raketave antitank të Forcave Radwan të Hezbollahut.
“Al-Zin kishte njohuri të rëndësishme në përdorimin e raketave kundër tankeve dhe ishte përgjegjës për dhjetëra sulme kundër civilëve izraelitë, komuniteteve dhe forcave të sigurisë”, tha ushtria izraelite.
Një burim i afërt me Hezbollahun tha se Al-Zin nuk ishte një figurë e lartë, por konfirmoi se ai ishte në njësinë e tij elitare, Radwan.
Deri më tani, Izraeli ka eliminuar 25 anëtarë të njësisë, mes tyre të paktën tre komandantë. Një prej tyre ishte edhe oficeri i lartë i Hezbollahut, Wissman Tawil, i cili luajti një rol kryesor në drejtimin e operacioneve në pjesën jugore të Libanit.
Hezbollahu filloi lëshimin e raketave nga majat e kodrave dhe fshatrave në Libanin jugor në drejtim të Izraelit më 8 tetor në mbështetje të aleatit të tij palestinez Hamas-it, i cili kreu një masakër brenda Izraelit një ditë më parë dhe mori pengje izraelite. Sulmi i Hamasit i vitit të kaluar shkaktoi reagimin e ashpër të Izraelit me forca tokësore, ajrore dhe detare në Rripin e Gazës.
Sulmet izraelite në Liban kanë shkaktuar vrasjen e afro 270 luftëtarëve të Hezbollahut dhe rreth 50 civilëve, mes tyre fëmijë, mjekë dhe gazetarë. Sulmet kanë goditur edhe objekte të ushtrisë libaneze dhe Forcat e Përkohshme të Kombeve të Bashkuara në Liban.
Shtetet e Bashkuara dhe vende të tjera kanë kërkuar arritjen e një zgjidhjeje diplomatike mes Izraelit dhe Hezbollahut, ndërsa kjo e fundit ka thënë se nuk do t’i ndalojë sulmet përpara se të zbatohet një armëpushim në Gaza.