Në Irak, dy dëshmitarë të tjerë dolën sot para gjykatës speciale e cila po gjykon ish diktatorin Saddam Hussein dhe 7 ish ndihmës të tij për vrasjen e më shumë se 140 myslimanëve shiitë 23 vjet më parë.
Seanca, e cila u transmetua në televizion, filloi disa orë me vonesë sepse Saddami nuk pranoi të marrë pjesë me ankesën se e kishin keqtrajtuar. Një nga dëshmitarët, i cili foli prapa perdes për të fshehur identitetin, i tregoi gjykatës se si ishte arrestuar dhe ishte mbajtur me shumë pak ujë dhe ushqim për disa ditë me radhë. Saddami dhe të pandehurit e tjerë akuzohen se dhanë urdhër për masat kundër banorëve të Duxhailit pas dështimit të një atentati kundër tij në vitin 1982.
Pas dëshmive të sotme, gjykatësi kryesor Rizgar Mohammed Amin e shtyu seancën për dy javë në mënyrë që vendi të mund të përqendrohet te zgjedhjet parlamentare të së enjtes. Nëse gjendet fajtor, Saddami mund të dënohet me vdekje.