Kryeministri irakian Nuri al Maliki tha se konferenca ndërkombëtare, që do të zhvillohet nesër në Bagdat, tregon se gjendja në Irak po përmirësohet. Zoti Maliki u tha gazetarëve sot në Bagdat se kjo konferencë është gjithashtu provë se procesi politik në Irak është i fortë dhe i qëndrueshëm.
Kryeministri irakian i bëri këto komente në një central elektrik gjatë një turneu të rrallë nëpër rrugët e Bagdatit. Forcat irakiane dhe ato amerikane janë në javën e tretë të një fushate sigurimi në kryeqytetin irakian. Në konferencën e Bagdadit do të marrin pjesë diplomatë nga vendet fqinje me Irakun dhe anëtarë të përhershëm të Këshillit të Sigurimit të OKB-së.
Ndërkohë, ushtria amerikane thotë se në operacionet e sotme forcat e koalicionit në Irak vranë një terrorist dhe kapën 16 të dyshuar të tjerë. Ushtria thotë se mes të ndaluarve është një i dyshuar që mendohet të ketë lidhje me Al-Kaidën dhe që është përgjegjës për rrëmbime, prerje kokash dhe operacione vetvrasëse në rajonet e Ramadit dhe Mosulit.//lk