Agjencia e Kombeve të Bashkuara për refugjatët thotë
se konfliktet në Irak dhe Afganistan janë burimi kryesor i rritjes së numrit të
refugjatëve në gjithë botën për të dytin vit me radhë.
Në një
raport që u bë publik dje, thuhet se refugjatët nga Iraku dhe Afganistani
përbënin pothuajse gjysmën e 11 milion e 400 mijë refugjatëve vitin e kaluar,
pasuar nga kolumbianët, sudanezët dhe somalezët.
Në raport thuhet gjithashtu se 26 milion njerëz u shpërngulën vitin e kaluar brënda vendeve të tyre si rezultat i konfliktit dhe persekutimit.
Komisioneri i lartë i
Kombeve të Bashkuara për refugjatët, Antonio Guterres, tha se konfliktet janë
arsyet kryesore për shtimin e numrit të refugjatëve. Ai tha se numri i të
shpërngulurve mund të shtohet si pasojë e konfliktit dhe paqëndrueshmërisë së
shkaktuar nga ngritja e çmimeve të artikujve ushqimorë si dhe shtimi i
konkurencës për burime të ndryshme, që po pakësohen për shkak të ndryshimeve
klimatike. (ze)