Një pikturë e Klod Monesë u shit mbi 80 milionë dollarë, duke hapur një
ankand një javor ku do të shiten piktura të artit modern.
Piktura
e quajtur "Liqeni i zambakëve të ujit" u shit nga Christie, duke u
bërë vepra më e shtrenjtë e artit e shitur nga një shtëpi ankandesh në
Evropë. Shitja e veprave të artit pritet të arrijë shifra rekord duke
sfiduar rënien globale ekonomike. Piktura e shitur, është vepra më
e njohur e serisë së Monesë për Zambakët e Ujit që ofrohet në një
ankand evropian. Moneja e kishte marrë frymëzimin për këtë seri në
fshatin Giverni', pranë Parisit, që ka disa nga kopshtet me lule më të
njohura të botës. Moneja ka pikturuar qindra variacione me temën e
zambakëve dhe i ka dhuruar publikut francez 8 piktura të mëdha në
mbarim të Luftës së Parë Botërore. Moneja e kaloi gjysmën e jetës së
tij duke pikturuar në shtëpinë dhe në kopshtet e tij dhe sot rreth 500
mijë vizitorë vijnë çdo vit në Giverni' për të parë vendin që frymëzoi
një nga piktorët më të famshëm të botës. /mm/