Pas një shpërthimi vetvrasës që shkaktoi dje vdekjen e tre izraelitëve në qendër të Jeruzalemit, udhëheqësi Palestinez, Jaser Arafat, u zotua të ndërmarrë hapa të menjëhershme për të ndaluar sulmet palestineze kundër civilëve izraelitë.
Edhe 40 persona të tjerë u plagosën nga shpërthimi që ndodhi në një zonë tregtare të qytetit.
Zoti Arafat dënoi me forcë sulmin dhe tha se do të ndërmarrë menjëherë të gjitha masat e nevojshme për t’u dhënë fund veprimeve të tilla dhe të ndalojë personat prapa këtyre sulmeve.
Sekretari amerikan i shtetit, Colin Powell, pati një bisedë të ashpër telefonike, siç e cilësuan zyrtarët amerikanë, me udhëheqësin palestinez. Sekretari Powell i tha zotit Arafat se ai duhet të dënojë shpërthimin publikisht dhe personalisht në mënyrën më të fuqishme, duke përdorur dy gjuhë, anglisht dhe arabisht.
Përgjegjësinë për shpërthimin e mori grupi Brigadat Martire Al-Aksa, një fraksion i lëvizjes Fatah të zotit Arafat. Autoritetet palestineze e patën arrestuar autorin e sulmit të djeshëm nga fillimi i këtij viti, ndërkohë që po përgatitej të kryente një sulm vetvrasës. Mirëpo, ai ishte liruar javën e kaluar në Ramallah.
Për pasojë të sulmit, Izraeli anulloi një takim të përbashkët në fushën e sigurimit me zyrtarë palestinezë që ishte planifikuar për dje në mbrëmje. Mirëpo, i dërguari i posaçm amerikan në Lindjen e Mesme, Anthony Zinni, pritet të takohet sot me të dyja palët.