Një zyrtare e lartë amerikane e cila po përpiqet të ç’tensionojë marrëdhëniet midis Indisë dhe Pakistanit, tha se depërtimi i ekstremistëve islamikë në Kashmirin Indian për të kryer akte terroriste duhet të marrë fund.
Ndihmës sekretarja amerikane e shtetit Christina Rocca i bëri këto komente për gazetarët në Nju Deli një ditë pas incidentit në Kashmirin Indian ku 34 persona u vranë gjatë një sulmi të ekstremistëve islamikë. Zonja Rocca do të shkojë sonte në Islamabad për bisedime me zyrtarët pakistanezë.
Kryeministri indian Atal Behari Vajpajee e quajti sulmin e djeshëm një krim të përbindshëm dhe tha se Indisë do ti duhet të hakmerret. Qeveria pakistaneze e dënoi sulmin e djeshëm dhe hodhi poshtë akuzat e Indisë se Pakistani mbështet sulmet terroriste.