Kryeministri izraelit, Ariel Sharon, tha se shteti izraelit ka vendosur t’i vrasë udhëheqësit e grupit ekstremist palestinez, Hamas.
Në një intervistë, kryeministri Sharon tha se Izraeli do të vazhdojë të kërkojë dhe të vrasë udhëheqësit e Hamasit dhe nuk do t’i japë këtij grupi asnjë moment qetësi.
Paralajmërimi i zotit Sharon gjatë intervistës së botuar në gazetën izraelite, Yediot Ahronot, u bë një ditë pas një përpjekjeje të dështuar izraelite për të vrarë udhëheqësin shpirtëror të grupit Hamas, sheikun Ahmed Yassin.
Sheiku Yassin dhe 15 persona të tjerë u plagosën lehtë kur një aeroplan izraelit hodhi një bombë 250 kilogramëshe mbi një ndërtesë apartamentesh në qytetin e Gazës.
Hamasi u shpreh se me këtë sulm Izraeli “ka hapur dyert e ferrit” dhe paralajmëroi se përgjigja e tij do të jetë e “një lloji që Izraeli nuk e ka parë ende.”
Izraeli tha se sulmi kishte për qëllim të vriste zyrtarë të Hamasit, të cilët ishin mbledhur për të planifikuar sulme terroriste.
Pas shpërthimit, Izraeli shtoi menjëherë masat e sigurimit. Forcat e sigurimit mbyllën sot kufijtë e Izraelit me Bregun Perëndimor dhe me Gazën dhe shtuan praninë e tyre në zona publike, ndërkohë që shteti hebraik përgatitet për sulme të pritshme hakmarrëse nga grupi ekstremist Hamas.
//ze//