Lehtësimi i kushteve për investimet e huaja i ka nxitur disa biznesmenë shqiptaro-amerikanë që të investojnë në Shqipëri. Ekrem Bardha, është një nga biznesmenët e njohur që sapo ka ndërtuar një kantinë për prodhimin e verërave. Ai thotë se problemet e shumta që ndeshi në Shqipëri, nuk e penguan projektin e tij në industrinë agro-ushqimore. Prodhimet origjinale shqiptare ai beson se do të mirëpriten edhe në Shtetet e Bashkuara, ku po përgatitet të eksportojë në restorante pranë komuniteteve shqiptare. Zoti Bardha u bën thirrje edhe biznesmenëve të tjerë shqiptaro-amerikanë që të investojnë në atdhe.