Bashkimi Evropian ka hapur një zyrë diplomatike në qytetin Bengazi në pjesën lindore të Libisë, që është aktualisht nën kontrollin e kryengritësve. Ky vendim merret ndërkohë që NATO ka shkallëzuar fushatën kundër regjimit të Gadafit:
Shefja e Bashkimit Evropian për Politikën e Jashme Kathrin Ashton u rrethua nga një grup zyrtarësh të kryengritësve dhe gazetarë kur arriti në Bengazi për të inauguruar zyrën e re të Bashkimit Evropian. Ajo pranoi një buqetë nga një vajzë e vogël me veshje tradicionale dhe zhvilloi bisedime me kreun e Këshillit Kombëtar Kalimtar të kryengritësve libianë, Mustafa Abdul Xhalil.
Zonja Ashton bëri shkurtimisht komente publike:
"Ndodhem këtu për të shpjeguar dhe për të qartësuar jo vetëm mbështetjen afat-shkurtër të BE, por edhe përmasat e kësaj mbështetjeje”.
Zonja Ashton tha se mbështetja përfshin ndihmë në kontrollin e kufijve dhe reformat e sigurisë, ekonominë, shëndetin, arsimin dhe shoqërinë civile.
"Kemi për synim të japim mbështetje jo vetëm tani, por për sa kohë që populli i këtij vendi na dëshiron të jemi këtu”.
Franca ishte vendi i parë që njohu kryengritësit libianë. Italia, Katari dhe Gambia ndoqën shembullin e saj. Disa vende, si Shtetet e Bashkuara kanë hapur bisedime me kryengritësit, por nuk kanë deklaruar një njohje të plotë diplomatike.
Vizita e zonjës Ashton në Libinë lindore zhvillohet ndërkohë që NATO shkallëzon fushatën kundër udhëheqësit libian Gadafi dhe përkrahësve të tij. Njoftimet bëjnë të ditur se avionët e NATO-s bombarduan portin e Tripolit dhe kompleksin e Gadafit pranë kryeqytetit pak para mbërritjes së zonjës Ashton.
Ajo është zyrtarja më e lartë e huaj që viziton rajonin e kontrolluar nga kryengritësit libianë. Një numër vendesh evropiane kanë ngrirë marrëdhëniet diplomatike me qeverinë e Gadafit, si dhe llogaritë bankare dhe investimet e tij jashtë vendit.