Parlamenti shqiptar hodhi sot një hap tjetër për të lehtësuar hetimet mbi demonstratën e dhunshme të 21 janarit, ku humbën jetën 4 protestues dhe u palgoën dhjetëra të tjerë civilë e ushtarakë. Komisioni i rregullores dhe mandateve miratoi kërkesën e prokurorisë për heqjen e imunitetit parlamentar të tre deputetëve socialistë Tom Doshi, Taulant Balla dhe Besnik Baraj, pasi ata vetë dërguan një letër ku jepnin miratimin e tyre për këtë masë që lejon hetimet e mëtejshme.
Kryetarja e parlamentit Jozefina Topalli tha se deputetët sollën në komisionin e mandateve një letër të përbashkët ku thoshin se janë dakord që kolegët të vazhdojnë procedurat për heqjen e imunitetit të tyre për t’u vënë në dispoziocion të drejtësisë. Ata deklaruan se shpjegimet e tyre lidhur me këkresën e prokurorisë dhe rolin e tyre në demonstratën e 21 janarit nuk do t’i jepnin para këtij komisioni parlamantar, sic pritej gjithë javën, por në seancën e radhës të parlamentit të enjten e ardhshme. Kërkesa e prokurorisë drejtuar parlamentit që t’u heqë atyre imunitetin parlamentar dhe për të vazhduar me procedura të tjera hetimore u shoqërua me një material voluminoz me prova mbi veprimtarinë e tyre atë ditë.
Emrat e tre deputetëve socialistë Doshi, Balla dhe Baraj u përmendën në deklaratën e fundit të prokurores së përgjithshme Ina Rama për heqje imuniteti, ndërkohë që njoftoi arrestimin e komandantit të përgjithshëm të Gardës, shoferit të tij, dhe specialistit të kompjuterave në kryeministri, me akuzat njëri për vrasjen e një protestuesi dhe të tjerët për fshehje të provave të krimit. Zonja Rama tha një ditë më parë se ngjarjet e 21 janarit po hetohen nëse protestuesit janë organizuar për veprime të dhunshme në tubim të paligjshëm. Ajo tha se nga laboratorët e kriminalistikës ende priten përgjigje të tjera mbi materiale dhe detaje dhe se emrat e përmendur në publik mund të mos jenë të vetmit që dyshohen për veprimet e paligjshme të asaj dite. Sipas saj, prokuroria ende nuk është gati të kërkojë hapjen e një gjyqi për të akuzuarit.