Në Shqipëri Komisioni qëndror i zgjedhjeve shpalli mbrëmë zyrtarisht kandidatin demokrat Lulëzim Basha si fitues të garës për kryeqytetin. Debate të shumta shoqëruan mbledhjen. Përfaqësuesit e opozitës përsëritën pretendimet e tyre për parregullsi të shumta në proces duke theksuar në veçanti mospërputhjen e shifrave mes votuesve dhe fletëve të votimit që rezultojnë më të shumta në numër. Por sipas demokratëve, Kolegji Zgjedhor e ka mbyllur këtë çështje, por socialistët pretendojnë të kundërtën dhe kanë njoftuar se do të kërkojnë pavlefshmërinë e procesit. Në mbrëmje vonë, zoti Basha u shfaq në një deklaratë në të cilën ai foli si kryetar i ardhshëm i Bashkisë së Tiranës duke u shprehur se pret mbylljen e të gjithë procesit për t’iu vënë punës për realizimin e premtimeve të bëra.
