Instituti për Studime Ndërkombëtare publikoi sot një studim mbi perceptimet e qytetarëve shqiptarë për të ardhmen e integrimit të vendit në Bashkimin Europian, dhe shpresat që ata mbajnë nga ky antarësim. Studimi zbuloi se mbi 94 për qind e qytetarëve mbështesin dhe mirëpresin antarësimin e vendit në Bashkimin Europian, kundrejt 88 për qind që ishte një vit më parë. Nga anketimi i shumë qytetarëve në të gjithë territorin, grupmosha dhe profesione të larmishme, doli se mbi 50 për qind e popullatës janë të informuar sa duhet mbi procesin e integrimit të shqipërisë në BE, dhe po aq, rreth gjysma, pohojnë se vendi nuk është ende gati për një antarësim të plotë në BE.
Drejtuesi i Institutit për Studime Ndërkombëtare, Albert Rakipi, thotë se një pjesë e madhe e qytetarëve e mbështesin këtë antarësim kryesisht prej heqjes së vizave në hapësirën Shengen. “Mbetet të shihet mbështetja reale e publikut për integrimin, atëherë kur vizat të hiqen vërtet dhe kur të dalin sfida të tjera përpara” - tha zoti Rakipi.
Krahas ejtes për lëvizje të lirë, është rritur gjithashtu numri i qytetarëve që pohojnë se e mbështesin antarësimin në BE të Shqipërisë për të gjetur punë në Europë
Ndërkohë, sipas studimit, është rritur numri i atyre qytetarëve që mendojnë se Shqipëria nuk ka arësye ta mbajë këtë antarësim si një përparësi të dorës së parë. Ambasadori i Spanjës në Tiranë, Emanuel Montobio, tha në takim se integrimi në BE varet shumë nga maturia e dhe cilësia e demokracisë.
“Bashkimi Europian po kërkon zbatimin e ligjit, ekonominë e tregut, zhvillimin e demokracisë dhe të gjitha këto janë saktësuar në përmbajtjen e standarteve. Tani duhet studiuar situata reale e shoqërisë, pra se cfarë bën ajo dhe cfarë pret ajo nga BE. Ajo që thuhet për Amerikën, ëshë po aq e vërtetë edhe për Europën: Mos pyet se cfarë bëri BE për ju, por mendoni se cfarë do të kontribuoni ju në Bashkimin Europian, cfarë vlerash dhe standartesh do të paraqitet shqipëria në dyert e saj” - tha zoti Montobio.
Ky është i pesti vit rresht që Instituti për Studime Ndërkombëtare kryen këto sondazhe për të studiuar perceptimet e qytetarëve shqiptarë në raport me Bashkimin Europian. Vitin që kaloi pati një ulje të gjithë treguesve, ndërsa sivjet pritshmëria e publikut ndaj Europës dhe qeveritarëve shqiptarë është shumë më e madhe. Madje shumica e të anketuarve shprehen që ndonëse e dinë se Shqipëria nuk është ende gati për një antarësim të plotë në BE, ata besojnë se ky antarësim do të ndodhë brenda 2-4 vjetësh, pra deri në vitin 2014.