Lidhje

Tiranë: Shtohen arrestimet për dhunë në familje pas vrasjes së gjyqtares Hafizi


Policia e Tiranës njoftoi sot se arrestoi 5 persona për dhunë fizike dhe psikologijke në familje, ndaj grave dhe fëmijëve të tyre.

Të arrestuarit e fundit janë të moshave nga 30 deri në 70 vjeç, shenjë kjo se dukuria ka një shtrirje të gjerë në shoqëri.

Kjo valë e fundit e arrestimeve për dhunë në familje erdhi disa ditë pas vrasjes me armë zjerri të gjyqtares Fildes Hafizi nga ish-bashkëshorti Fadil Kasemi.

Këshilli i Lartë i Drejtësisë nisi sot një kontroll të posaçëm ndaj 3 gjyqtarëve, që i dhanë atij një dënim të lehtë pas përpjekjes për ta vrarë gjyqtaren me armë dy vjet më parë në një mjedis publik në plazhet e Golemit të Kavajës.

Pas këtij dënimi, Kasemi përfitoi edhe nga një amnisti fund-vitin e kaluar dhe doli sërish i lirë, duke e arritur vrasjen e gjyqtares.

Presidenti i Republikës, Ilir Meta, kërkoi hetime të hollësishme për këtë rast dhe u angazhua se nuk do të nënshkruajë asnjë falje dënimi për të dënuar, që kryejnë krime në familje.

Ai kërkoi nga gjykatat dhe nga policia zbatimin e rreptë të urdhërave të mbrojtjes për viktimat e dhunës në familje.

9 gra shqiptare janë vrarë nga bashkëshortët e tyre vetëm gjatë këtij viti.

Këto vdekje, sipas veprimtarëve të të drejtave njerëzore, janë vetëm “maja e ajsbergut” e një dhune shumë-vjeçare të fshehur e të panjohur, që ushtrohet në familjet shqiptare ndaj grave, vajzave e fëmijëve; dhunë për të cilën burrat nuk ndëshkohen, ose marrin dënime të lehta, edhe pse ligjet janë shumë të rrepta në këtë drejtim.

Facebook Forum

XS
SM
MD
LG