Prokuroria e Përgjithshme nisi sot hetimet mbi të dhënat e dyshuara kriminale ndaj kryetarit të Bashkisë së Krujës, Artur Bushi.
Zyra e re e prokurorisë për dekriminalizimin i kërkoi Komisionit Qendror të Zgjedhjeve të verifikojë nga vetëdeklarimi i dekriminalizimit të kryetarit të bashkisë së Krujës, Artur Bushi, disa të dhëna, të cilat kërkojnë detajim më të thelluar në të shkuarën e tij.
Verifikimin fillestar do ta bëjë KQZ-ja dhe pas kësaj prokuroria do të vijojë hetimet.
KQZ publikoi dy javë më parë vetëdeklarimet e ministrave, deputetëve, bashkiakëve dhe këshilltarëve.
Mes tyre ka edhe të hetuar e dënuar për krime të ndryshme.
Mes tyre, bashkiaku socialist i Krujës, Artur Bushi, pranoi se u ndaluar dy herë në Itali.
Ai u ndalua së pari në vitin 1996 dhe herën e dytë në vitin 2010 u arrestua si i dyshuar për “trafik lëndësh narkotike”, por u lirua me vendim gjyqësor.
Prokurorët nisën verifikimet edhe për kryetarin e bashkisë së Kavajës, Elvis Roshi.
Ai u akuzua nga opozita se ka ndërruar emrin për të fshehur të kaluarën e tij dhe përfshirje në veprimtari kriminale.
Roshi pohoi se është ndaluar nga policia në Gjermani dhe në Itali, por se nuk është subjekt i asnjë krimi që parashikon ligji i dekriminalizimit.
Ai tërhoqi dorëheqjen, që shpalli disa ditë më parë, pasi siguroi deklarata nga policia gjermane dhe italiane, se nuk ka marrë dënime prej tyre.