Zyrtarët e lartë të Bashkimit Evropian janë vënë në përpjekje për përgatitjen e bisedimeve ndërmjet Prishtinës dhe Beogradit. Ndonëse ende nuk është e qartë as forma e as koha e bisedimeve, Beogradi shpreson të hap edhe çështjet që kanë të bëjnë me statusin, ndërsa Prishtina ngulë këmbë se kjo çështje është e përfunduar dhe madje Rezoluta e përbashkët e Bashkimit Evropian dhe Serbisë e miratuar në Asamblenë e Përgjithshme të OKB-së përkufizon fushat e bisedimeve. Analistët thonë ndërkaq se para se të tërhiqen të ashtuquajturat “vija të kuqe”, duhet të përcaktohen temat për të cilat duhet të bisedohet.