Lidhje

Tiranë: Mbi 200 ankesa për shkelje privacie dhe të drejtë informimi


Shoqëria shqiptare ka patur vazhdimisht probleme me mos-informimin, shkeljen e privacisë dhe publikimin e të dhënave personale në dëm të qytetarëve të ndryshëm.

Dita Evropiane e Privatësisë në Tiranë
please wait

No media source currently available

0:00 0:03:02 0:00

Por vetëm kohët e fundit është duke u rritur vetëdija dhe kujdesi i tyre për të mbrojtur të dhënat, falë punës së Zyrës së Komisionerit për të Drejtën e Informimit dhe Mbrojtjen e të Dhënave Personale.

Zyra është themeluar në vitin 2008 dhe në mars bëhen 10 vjet qyshkur parlamenti miratoi ligjin “për mbrojtjen e të dhënave personale”.

Vetëm në katër vitet e fundit numri i ankesave të qytetarëve është trefishuar, nga 73 ankesa në vitin 2014, 140 ankesa në 2015, 150 në 2016 dhe mbi 200 ankesa në vitin 2017.

“Ndërgjegjësimi i qytetarëve është një nga detyrat kryesore të Autoritetit, krahas mbikëqyrjes zbatimin e legjislacionit në këtë fushë, dhe tani po shfaqen rezultatet e para” - tha Besnik Dervishi, Komisioneri për të Drejtën e Informimit dhe Mbrojtjen e të Dhnave.

Komisioneri Dervishi i bëri këto komente në një veprimtari kushtuar 28 janarit, Ditës Europiane për Mbrojtjen e të Dhënave Personale.

Në të morën pjesë deputetë dhe mbi 70 studentë, të cilët ndoqën për disa ditë leksione mbi Informimin dhe Privatësinë, si pjesë e përpjekjeve për të ndërgjegjësuar qytetarët dhe për të bërë ligjin sa më të njohur ligjin.

“Zyra e Komisionerit po bën një punë shumë të mirë për nxitjen e qytetarëve në ushtrimin e të drejtave të tyre. I nxis të gjithë sidomos të rinjtë, që të mos ngurrojnë të paditin shkelje në këtë fushë. Kuvendi i Shqipërisë do e mbështesë akoma edhe më shumë këtë Autoritet për konsolidimin e bazës ligjore dhe me burimet e nevojshme për mbikëqyrjen e zbatimit të akteve rregullatore” - tha Vasilika Hysi, nënkryetare e parlamentit.

Në Ditën Evropiane të Mbrojtjes së të Dhënave Personale Posta Shqiptare emetoi një pullë postare për ta shënuar atë në kujtesën e përdoruesve, vepër e piktorit Artion Baboçi.

Shqipëria ratifikoi në vitin 2004 Konventën 108 të Këshillit të Europës dhe Protokollin Shtesë “Për mbrojtjen e individëve në lidhje me përpunimin automatik të të dhënave personale”

28 Janari është ditë europiane e Mbrojtjes së të dhënave personale, por ajo njihet tashmë në shkallë botërore, edhe jashtë Europës, si Dita e Privatësisë.

Facebook Forum

XS
SM
MD
LG