Lidhje

Tiranë: Pa marrëveshje mbi formularin e dekriminalizimit


Parlamenti shqiptar

Shumica dhe opozita nuk gjetën përsëri mirëkuptimin në këshillin parlamentar të legjislacionit, ku diskutuan mbi aktet nënligjore të ligjit për dekriminalizimin e politikës.

Deputeti socialist Taulant Balla paraqiti dy formularë sa u takon krimeve për të cilat individë të caktuar nuk do të lejohen të kandidojnë për deputetë.

Deputeti i partisë demokratike, Oerd Bylykbashi, mbrojti variantin e opozitës për dekriminalizimin.

Debatet pa mirëkuptim mes socialistëve dhe demokratëve erdhën një ditë para seancës parlamentare të të enjtes, ku ende nuk dihet nëse do të kalojë një projekt-vendim sipas propozimeve të partisë demokratike apo asaj socialiste.

Partia demokratike kërkon një kontroll të gjerë të figurës, që kandidon për detyra shtetërore. Mes të tjerave, formulari i propozuar nga demokratët kërkon të dijë nga kandidatë nëse ata janë arrestuar ndonjëherë nga policia.

Demokratët pohojnë se socialistët duan ta heqin prokurorinë si mekanizëm kontrolli dhe ka futur vetëdeklarimin e zyrtarëve.

Opozita thotë se formulari i propozuar nga socialistët cënon thelbin e ligjit të dekriminalizimit, sepse pyet shkurt nëse kandidati është dënuar apo jo me vendim të formës së prerë nga gjykata.

Mospajtimet midis palëve po rrezikojnë që ligji i dekriminalizimit të shtyhet deri në kohë dhe të mos hyjnë në zbatim, sepse ndarjet për të janë ende të thella.

Shiko komentet (2)

Ky forum është mbyllur
XS
SM
MD
LG