Lidhje

Ekonomia e Spanjës


Spanja thotë se recesioni ekonomik i vendit po thellohet. Banka Qendrore e vendit tha sot se ekonomia vendit është tkurrur gjatë periudhës korrik-shtator, për tre-mujorin e pestë radhazi. Po ashtu numri i të papunëve në Spanjë është rritur, duke arritur shifrën e 25 për qind të popullsisë së aftë për punë. Analistët thonë se raporti më i fundit ekonomik mund të përbëjë një presion të ri për kryeministrin Mariano Rajoy, që ai të kërkojë ndihmën ndërkombëtare, duke ju bashkuar Greqisë, Irlandës dhe Portugalisë, që kërkojnë paketa ndihmash nga fqinjët e tyre evropianë.

Banka Qendrore Evropiane thotë se do të blejë një sasi të pakufizuar stoqesh, për t’i ardhur në ndihmë vendeve të prekura më rëndë nga borxhi në bllokun prej 17 vendesh. Deri tani, kryeminsitri spanjoll i ka rezistuar ndihmës nga jashtë.

Ndërkohë, kryeministri grek Antonis Samaras u takua me aleatët e koalicionit qeveritar, në përpjekje për arritjen e një marrëveshjeje mbi masat e ashpëra ekonomike, që i kanë kërkuar vendit udhëheqësit ndërkombëtarë, para se të bien dakord të japin segmentin e dytë të ndihmës për vendin. Greqia është takuar me huadhënësit që nga korriku, por bisedimet kanë ngecur për shkak të kushteve të huadhënies.

Ekonomia e Spanjës është ka rënë ndjeshëm, duke u kthyer nga një prej vendeve më të begata të Evropës, në një prej vendeve më të dëshpëruara. Kur korporatat dhe individët nuk mund të paguanin borxhet e mëdha të marra gjatë viteve të begatisë, qeverisë iu desh të ndërhynte për të ndihmuar, por tani, vetë qeveria mund të ketë nevojë për ndihma nga Evropa.

Në një mëngjes kohët e fundit në një zyrë papunësie në Madrid, radha shtrihej përreth ndërtesës. Këta janë disa prej 25 për qind të papunëve spanjollëve.

“Kohën, që unë e kaloja me fëmijët, tani duhet t’ia kushtoj gjetjes së punës, veçanërisht në teknologjinë e informacionit. Për mua kjo është një botë e re dhe kam nevojë t’i kushtoj shumë kohë”.

“Për një grua 47 vjeçare të divorcuar është e pamundur të paguajë këstin e shtëpisë dhe të paguajë për shpenzimet e fëmijëve”.

“Do të desha të krijoja familjen time, por situata nuk më lejon ta bëj këtë”.

Tek zyra e papunësisë, njerzit presin të mbushin formularët për të vazhduar përfitimet nga papunësia dhe për të gjetur punë. Por vendet e punës janë të pakta në Spanjë, ku industria e ndërtimit është bllokuar, madje edhe bizneset e pasura nuk mund të marrin kredi që të zgjerohen.

Në sindikatën më të madhe të Spanjës, zyrtari i lartë Manuel Bonmati thotë se rradhët e të papunëve ka të ngjarë të mbeten të gjata.


“Përkeqësimi i gjendjes nuk është mundësi, por një realitet që do të ndodhë. Perspektivat e zhvillimit ekonomik në Bashkimin Evropian janë paralizuar”.

Në disa pjesë të Madridit, është vështirë të vësh re se vendi përballet me krizë ekonomike, megjithatë spanjollët po shpenzojnë më pak dhe shumë prej tyre kanë humbur punën ose u është ulur roga.

Udhëheqësit e Spanjës po kundërshtojnë një paketë ndihmash nga Bashkimi Evropian për të ulur koston e huamarrjes dhe për të ndihmuar rikthimin e zhvillimit ekonomik sepse një gjë e tillë do të kufizonte opsionet e tyre politike. Por disa ekspertë thonë se udhëheqësit spanjollë nuk duhet të presin shumë gjatë. Guntram Wolff, është me organizatën evropiane Bruegel në Bruksel.

“Ata nuk duhet ta humbasin shansin për të vepruar. Dhe ky moment mund të jetë tani, sepse tani udhëheqësit spanjollë mund të kalojnë nga një pikë e fuqisë relative dhe të përcaktojnë më së miri se çfarë duhet të bëjnë”.

Kjo është diçka e lehtë për t’u thënë, por politikisht më vështirë për t’u bërë, si për udhëheqësit spanjollë ashtu edhe për homologët e tyre në ekonomitë më të fuqishme evropiane.
Por profesori i ekonomisë, Federico Steinberg beson se ata do të bien dakord.

“Eurozona pa Spanjën nuk besoj se mund të mbijetojë. Dhe në fund të fundit, ata do të arrijnë një mënyrë për të shpëtuar euron dhe kjo kërkon që të shpëtohet edhe Spanja”.
Dhe kjo nuk mund të bëhet shpejt sa duhet për miliona të papunë të Spanjës, shumë prej të cilëve janë pa punë për vite.

XS
SM
MD
LG