Lidhje

Elizabeta Ivezaj, Miss Miçigani konkurron për Miss USA


Konkursi i bukurisë për të zgjedhur Miss USA këtë vit do të mbahet më 8 qershor, dhe përfaqësuesja e shtetit të Miçiganit është Elizabeth (Elizaveta) Ivezaj, bija e dy shqiptarëve nga Mali i Zi. Edhe pse ajo ka lindur dhe është rritur në Miçigan dhe nuk ka patur mundësi të vizitojë vendlindjen e prindërve të saj, Elizabeth thotë se origjina e saj shqiptare është shumë e rëndësishme, madje ka përfshirë elementë të origjinës edhe në fustanin e konkursit. Ajo i tha Zërit të Amerikës se reagimi i komunitetit shqiptar për fitoren e saj ka qënë i mrekullueshëm. Me Miss Miçiganin bisedoi kolegia Joana Allamani.
Elizabeta Ivezaj, Miss Miçigani 2014
please wait

No media source currently available

0:00 0:06:55 0:00


Zëri i Amerikës: Është një nder i madh që një shqiptare është Miss Miçigani USA, por na tregoni pak rreth vetes suaj. Jeni mbretëreshë bukurie, por kjo është vetëm pjesë e historisë suaj. Me çfarë merreni përveç botës së bukurisë?

Elizabeth Ivezaj: Përveç botës së misseve, unë jam një bijë dhe motër – kam dy vëllezër; jam studente në universitetin Oakland në Miçigan për psikologji dhe studimet për çështjet e grave. Në kohën time të lirë, më pëlqen shumë të lexoj...lexoj çdo gjë që ka të bëjë me çështjet e grave...

Zëri i Amerikës: Konkurset e bukurisë kritikohen shpesh nga përkrahësit e të çështjeve të grave, për arsyen se ata objektivizojnë gratë. Çfarë do të thonit në lidhje me këtë?

Elizabeth Ivezaj: E kuptoj sepse mendojnë në atë mënyrë, mendoj se cilido ka të drejtën e opinionit të tij, dhe nëse mendojnë se konkurset e bukurisë nuk i përfaqësojnë mirë gratë, e kuptoj se pse mendojnë ashtu. Por unë kam tjetër mendim. Këto konkurse të ndihmojnë për të forcuar karakterin, të ndihmojnë të mësosh se çfarë personi je, fuqizojnë gratë. Nëse je e sigurt në vetvete për të dalë me rroba banjo në skenë, atëherë pse jo.

Zëri i Amerikës: Dhe cili ishte motivimi juaj për të marrë pjesë në një konkurs të tillë?

Elizabeth Ivezaj: Ndodhi shumë rastësisht. Kam miq që më inkurajuan të merrja pjesë, por nuk isha marrë me diçka të tillë më parë. Vendosa ta bëja, pse jo? Kurrë nuk e di rezultatin e diçkaje pa e provuar më parë. Kështu që vendosa ta bëja, por edhe për t’u thënë vajzave të tjera shqiptare të bëjnë diçka ndryshe nga e zakonshmja, të inkurajoj njerëz të tjerë, të shërbej si shembull për të tjerë.

Zëri i Amerikës: Përmendët që do të donit të frymëzonit vajzat, por në mënyrë specifike vajzat shqiptare. Sa e rëndësishme është origjina juaj shqiptare?

Elizabeth Ivezaj: Është shumë e rëndësishme për mua. Meqë të dy prindërit e mi janë nga Mali i Zi, dhe emigruan këtu në Amerikë, mendoj se jemi shumë të lidhur me njerëzit tanë, dhe duhet të jemi admiruesit e parë të njerëzve tanë. Kështu që, nëse mundem të inkurajoj vajzat shqiptare të jenë Miss Miçigani e ardhshmja, ose të ndjekin cilëndo ëndërr që kanë, do të ishte kënaqësi ta bëja një gjë të tillë.

Zëri i Amerikës: Herën e fundit që Miçigani fitoi kurorën e Miss USA ishte në vitin 2010 nga Rima Fakih dhe në skenë ajo kishte veshur një fustan të një stilisteje shqiptaro-amerikane nga Miçigani, Katerina Bocci. A do e shohim një bashkëpunim mes jush? Keni vendosur se çfarë do të veshni?

Elizabeth Ivezaj: Fustani im për konkursin kombëtar po përgatitet tani, dhe edhe pse Katerina është e mrekullueshme...unë kam qenë edhe modele për të, por zgjodha stilisten Sherri Hill. Nuk mund të jap shumë hollësi rreth fustanit por mund të them këtë: kam përfshirë pak elemente të origjinës time në fustanin por konkursin kombëtar.

Zëri i Amerikës: Konkursi Miss USA është shumë afër, më 8 qershor. Çfarë po bëni për t’u përgatitur për të?

Elizabeth Ivezaj: Tani data është shumë afër, kështu që përgatitja mendore, fizike, ruajtja e qetësisë se po përgatitem për dy javë, dy nga javët më të vështira të jetës sime. Por gjëja kryesore është përgatitja mendore ndërsa i afrohemi ditës.

Zëri i Amerikës: Përmendët që jeni studente dhe po studioni për psikologji dhe për studimet e çështjeve të grave. Si arrisni të balanconi përgjegjësitë tuaja si studente dhe ato të qenit Miss Miçigani USA?

Elizabeth Ivezaj: Unë vij nga një familje që ku jemi mësuar të punojmë dhe të shkojmë në shkollë njëkohësisht, kështu që nuk ishte shumë e vështirë për mua. Dhe të studiuarit për të drejtat e grave më ndihmoi shumë në botën e bukurisë. Të mësuarit rreth shtypjes së grave por dhe fuqizimit të tyre, dhe tani unë mbaj kurorën, besoj se këto janë të ndërlidhura. Pra, me çdo gjë, besoj se thjesht duhet gjetur koha dhe ekuilibri i duhur dhe pastaj çdo gjë mund të arrihet.

Zëri i Amerikës: Dhe si ka qenë reagimi i fitimit tuaj nga komuniteti shqiptar? Besoj se njerëzit janë të lumtur të shohin një shqiptare të fitojë titullin e Miss Miçiganit, por si e kanë shprehur?

Elizabeth Ivezaj: Sinqerisht, mbështetja nga komuniteti shqiptar ka qenë e pabesueshme. Mendoja se njerëzit do të ishin të lumtur, por nuk kisha imagjinuar se do të kishte kaq shumë reagime pozitive. Njerëz nga Shqipëria, ose Nju Jorku kanë shprehur gëzimin dhe mbështetjen e tyre, dhe ka qenë e mrekullueshme. Dhe kjo më motivon të vazhdoj përpara. Të gjesh kaq shumë mbështjetje nga njerëzit e tu është padyshim e mrekullueshme.

Zëri i Amerikës: Dhe çfarë keni në plan të bëni në të ardhmen?

Elizabeth Ivezaj: Aspiratat e mia janë të vazhdoj studimet e mia për çështjet e grave dhe psikologji; shpresoj të vazhdoj studimet për masterin, por tani çdo gjë është e pasigurtë pasi Miss USA është kaq afër dhe fokusi im tani për tani është aty.

Zëri i Amerikës: Dhe a keni ndonjë mesazh për vajzat që do të bënin diçka ndryshe?

Elizabeth Ivezaj: Patjetër që kam një mesazh për to, sepse unë isha vetë një njeri i ndrojtur, por nuk duhet të hezitosh të bësh atë që do. Ke vetëm një jetë për të jetuar; duhet të ndjekësh ëndrrat e tua dhe mos të heqësh dorë nga pasioni juaj. Unë kurrë nuk kisha marrë pjesë në një konkurs bukurie më parë...nëse do të më kishit thënë vite më parë se do të isha Miss Miçigani një ditë, nuk do e kisha besuar. Por kështu ndodhin gjërat, prandaj duhet të ndiqni ëndrrat tuaja.

Zëri i Amerikës: A keni ndërmend të shkoni në Shqipëri në të ardhmen?

Elizabeth Ivezaj: Shumë njerëz ma kanë bërë atë pyetje dhe unë ende nuk kam qenë as në Shqipëri dhe as në Mal të Zi, por do të doja shumë të shkoja. Kam parë foto të vendit dhe duket shumë i bukur dhe do të ishte kënaqësia ime të shkoja nëse paraqitet mundësia.
XS
SM
MD
LG