Një ekip policësh të Bashkimit Evropian po ndihmon Shqipërinë të ndalë rrjedhën e emigrantëve që kalojnë kufirin e saj me Greqinë për të arritur në Evropën perëndimore dhe veriore.
Pesëdhjetë policët nga Gjermania, Republika Çeke, Letonia dhe Lituania po punojnë në kuadrin e policisë kufitare të Bashkimit Evropian të njohur me emrin Frontex.
Ekipet e policisë së Bashkimit Evropian veprojnë në Shqipëri që nga 22 maji i këtij viti.
"Gjatë dy muajve të fundit, ne kemi vendosur disa ekipe këtu, për të ndihmuar zyrtarët shqiptarë në çështjen e hyrjes së emigrantëve përmes kufirit. Prapa meje duken kufijtë grekë. Shohim një hyrje të vazhdueshme të emigrantëve këtu dhe kemi ardhur për të ndihmuar policinë shqiptare në mbikqyrjen e kufirit dhe zbulimin e çdo aktiviteti të mundshëm kriminal, duke përfshirë edhe kontrabandën e njerëzve", thotë zëdhënësi i FRONTEX-it, Krzystof Borowski për televizionin Reuters.
Disa prej emigrantëve të ndaluar në kufi banojnë në një qendër pritjeje për azilkërkuesit në Tiranë.
"Para një viti e gjashtë muajsh, u largova në këmbë nga Iraku për në Turqi, duke i paguar dikujt 500 euro. Qëndrova në Turqi 15 ditë dhe pastaj shkova në Greqi me anije, duke paguar 1500 euro. Në Greqi qëndrova një vit e pesë muaj dhe pas kësaj erdha në Shqipëri, ku ndodhem tani,” thotë Ali Sulejman, emigrant nga Iraku.
"Dua të shkoj në Gjermani, dua të jetoj në Gjermani. Gjermania është shumë e mirë, është shumë mirë të jetosh në Gjermani".
"Motra ime jeton në Gjermani, dua të shkoj në Gjermani", thotë emigranti irakian.
Facebook Forum