Avokati personal i Presidentit Donald Trump, Rudy Giuliani thotë se diskutimet e zotit Trump me zyrtarët rusë lidhur me ndërtimin e një Kulle Trump në Moskë, vazhduan gjatë gjithë kohës që ai po bënte fushatë për Shtëpinë e Bardhë në vitin 2016, disa muaj më shumë nga ç’ishte pranuar më parë.
“Në bazë të asaj që dimë, ato vazhduan gjatë gjithë vitit 2016”, tha zoti Giuliani për emisionin “Meet the Press” të televizionit NBC. Zoti Giuliani tha se "nuk u zhvilluan shumë biseda, por kishte pasur biseda. Nuk jam i sigurt për datat e sakta”.
"Ndoshta mund të kenë vazhduar deri në tetor, nëntor. Pyetjet tona mbulojnë periudhën deri në zgjedhje”, tha zoti Giuliani, duke iu referuar qyetjeve me shkrim nga Prokurori i Posaçëm, Robert Mueller të cilave u është përgjigjur Presidenti Trump.
"Pra gjatë asaj periudhe mund të kenë folur për të. Por nga ç’i kujtohet presidentit, se bisedat për këtë temë ishin zbehur mjaft”, tha zoti Giuliani, duke shtuar se projekti nuk u materoalizua kurrë.
Gjatë fazës së parë të garës së vitit 2016, si kandidat republikan, zoti Trump tha shpesh se nuk nuk kishte lidhje biznesi me Rusinë.
Giuliani, ish-kryetar i Bashkisë së Nju Jorkut, tha se Michael Cohen, ish-avokat personal i zotit Trump “duhet t’i kujtojë shumë më mirë negociatat e Moskës sesa presidenti. Ishte diçka shumë më e rëndësishme për të. Ishte misioni i tij i vetëm. Presidenti po bënte fushatë. Prandaj është e kuptueshme që nuk kishte ndonjë përqendrim shumë të madh tek një projekt që kishte ngecur”.
Senatori nga Virxhinia, Mark Warner, demokrati më me peshë në Komisionin e Senatit për Zbulimin që ka hetuar lidhjet e fushatës së zotit Trump me Rusinë, tha në të njëjtin emision se kohëzgjatja e përpjekjeve të zotit Trump për të ndërtuar grataçelën në Moskë, deri në nëntor 2016, kur u mbajtën zgjedhjet ishin “diçka e re për të dhe një lajm i rëndësishëm”.
“Pse e mësojmë vetëm tani këtë fakt, kur ka pasur kaq shumë hetim”, tha ai.
Cohen ka pranuar fajësinë mes të tjerësh edhe se ka gënjyer Kongresin për përmasat e përfshirjes së zotit Trump në projektin e Moskës, duke I thënë një komisioni të Kongresit se ato përpjekje u ndërprenë në janar 2016.
Ai tha se kishte gënjyer në mënyrë që ajo thoshte ai të përputhej me komentet publike të zotit Trump, por së fundmi ka thënë se diskutimet e projektit kishin vazhduar deri në qershor 2016, një kohë më e shkurtër nga sa pranoi zoti Giuliani.
Organizata mediatike BuzzFeed, njoftoi javën e kaluar se Presidenti amerikan Donald Trump e kishte udhëzuar avokatin e tij Cohen të gënjente Kongresin, por Zyra e Prokurorit të Posaçëm, Robert Mueller e mohoi saktësinë e këtij njoftimi.
Facebook Forum