Udhëheqësi i opozitës venezueliane Juan Guaido tha se ndihmat humanitare do të futen në vend brenda dy javësh edhe pse presidenti Nicolas Maduro nuk po i lejon.
Huan Guaido, i cili njihet nga Shtetet e Bashkuara dhe 50 vende të tjera si Presidenti i përkohshëm i Venezuelës, foli të martën përpara mijëra mbështetësve pjesë e një proteste të vazhdueshme për të thyer mbështetjen që ushtria po i jep Nicolas Maduros si dhe për ta detyruar udhëheqësin socialist të largohet nga pushteti.
"Më 23 shkurt ndihmat humanitare do të hyjnë në Venezuelë. Nga sot ne do të mbështesim të gjithë sektorët, atë të transportit, shërbimit shëndetsor për t’u organizuar", tha Juan Guaido.
Udhëheqësi i opozitës ka këmbëngulur që SHBA-ja të ndihmojë Venezuelën me ndihma ushqimore emergjente dhe ilaçe. Ndihmat ndodhet në një depo në qytetin kufitar kolumbian të Kukutas.
Nicolas Maduro, i cili vazhdon të gëzojë mbështetjen e ushtrisë së fuqishme të vendit, thotë se protestat e opozitës janë pjesë e një përpjekjeje të SHBA-së për grusht shteti dhe ka refuzuar të lejojë që ndihmat amerikane të futet në vend.
Juan Guaido po përpiqet të rrëzojë nga pushteti Nicolas Maduron me qëllimin për të krijuar një qeveri të përkohshme si dhe për zhvillimin e zgjedhjeve të reja presidenciale.
Venezuela po ballafaqohet me një krizë të fortë ekonomike dhe një nivel tejet të lartë të inflacionit, ndërsa miliona qytetarë po përballen me mungesa të produkteve bazë.
Sipas Kombeve të Bashkuara që nga viti 2015 nga vendi janë larguar më shumë se tre milionë persona.
Facebook Forum