Lidhje

Kosovë: Hiqen nenet e debatueshme për median


Parlamenti i Kosovës, hoqi sonte nga Kodi Penal nenet e diskutueshme që kanë të bëjnë me mediat në Kosovë. Vendimi mori miratimin në parim të 59 deputetëve, ndërsa vetëm dy ishin të paanshëm.

Kodi, i cili u ri procedua në Parlament, përfshinte nene në të cilat thuhej veç tjerash se gazetarët do të jenë “penalisht përgjegjës” në rastet kur refuzojnë të zbulojnë burimet e tyre të informimit për të parandaluar “një sulm që përmban rrezik të pashmangshëm ndaj jetës apo integritetit personal”.

Qeveria e Kosovës vendosi ta ri procedojë Kodin Penal pas reagimeve të ashpra që nxiti miratimi i tij në prill dhe refuzimi i Parlamentit në fillim të muajit qershor për të hequr nenet e diskutueshme.

Refuzimi i Parlamentit për ndryshime çoi në dorëheqjen e zëvendëskryeministrit të Kosovës, Hajredin Kuçi, ndërsa nxiti reagime të ashpra të organizatave vendase e ndërkombëtare të gazetarëve.

Javën e kaluar, lëvizja Vetëvendosje dërgoi çështjen në Gjykatën Kushtetuese.

Kodi Penal i Kosovës, nëse ai miratohet edhe në shqyrtimin e dytë, pritet të fillojë të zbatohet në janar të vitit 2013.

Asociacioni i Gazetarëve Profesionistë të Kosovës mirëpriti sonte vendimin e Parlamentit, duke u bërë thirrje deputetëve që “të vazhdojnë ta miratojnë edhe në shqyrtim të dytë këtë projektligj, pa amandamente të cilat do të mund të paraqitnin masa ndëshkuese ndaj medieve”.
XS
SM
MD
LG