Në gjashtë vjetorin e pavarësisë së saj, Kosova është vënë në përpjekje për të shtrirë sovranitetin e saj edhe në veriun e banuar me shumicë serbe, nëpërmjet krijimit të institucioneve të pushtetit lokal në bazë të ligjeve të Kosovës. Në veriun e Mitrovicës, sot u hap fushata pesëditëshe për zgjedhjet e 23 shkurtit për kryetarin e kësaj komune, ndërsa tashmë tri komunat tjera atje kanë zgjedhur drejtuesit dhe kuvendet e tyre komunale. Përfshirja e asaj zonë në zgjedhjet lokale të Kosovës u bë e mundur në procesin e bisedimeve ndërmjet Kosovës dhe Serbisë.