Largohet grupi i parë i afganëve të strehuar përkohësisht në Kosovë

Një grup shtetasish afganë të strehuar përkohësisht në Kosovë u larguan gjatë së enjtes.

Jeta Tela, shefe e kabinetit në ministrinë e Punëve të Brendshme të Kosovës, tha një përgjigje për Zërin e Amerikës se destinacioni është Britania e Madhe.

“117 persona largohen sot nga Kosova dhe fluturojnë për në Britaninë e Madhe”, tha zonja Tela.

Ambasada britanike në Prishtinë falënderoi Kosovën për “bujarinë”, ndërsa zëvendës ambasadori Jacob Webber, tha se po punohet për dërgimin e të gjithë atyre që janë në Kosovë në shtete të tjera për strehim afatgjatë.

“Ata kanë kaluar nëpër një situatë të rëndë. Është një rrugë e vështirë që ata kanë kaluar. Atyre u kanë mbetur edhe një distancë e shkurtër për të kaluar. Dhe tashmë janë nisur me avion drejt Mbretërisë së Bashkuar, por këtë gjë ne nuk do të mund ta bënim pa Kosovën”, theksoi ai.

Ambasada amerikane falënderoi Kosovën për sigurimin e strehimit të përkohshëm dhe “partnerët britanikë për mikpritjen e afganëve në rrezik në shtëpitë e tyre të reja”.

Të larguarit e sotëm janë në mesin e gati një mijë shtetasve afganë të cilët janë strehuar në Kosovë që nga fundi i muajit të kaluar, si pjesë e përpjekjeve ndërkombëtare për t’i shpëtuar ata nga dhuna në Afganistan.

Lexoni edhe këtë

Mbërrin në Kosovë avioni me grupin e parë të qytetarëve afganë

Sipas autoriteteve në Kosovë shumica e tyre janë gra, fëmijë e pleq, familjarë të kontraktorëve që kanë punuar me koalicionin e udhëhequr nga Shtette e Bahskuara në Afganistan.

Refugjatët afganë po qëndrojnë në dy kampe në qytetin e Ferizajt, rreth 40 kilometra larg kryeqytetit. Rreth 800 prej tyre në ish kampin e kompanisë amerikano-turke, Bechtel-Eenka, si dhe një pjesë e vogël në kampin e trupave amerikane, Bondsteel.

Autoritetet në Kosovë janë zotuar të strehojnë përkohësisht deri në dy mijë shtetas afganë, derisa të përfundojnë procedurat për destinacionin e tyre përfundimtar.

Shtetet e Bashkuara kërkuan nga Kosova të pranojnë një numër afganësh, që kanë punuar me forcat amerikane, të cilët ndjehen të frikësuar nga hakmarrja e talebanëve, që morën nën kontroll vendin pas tërheqjes së trupave të huaja.