Ministria e Shëndetësisë në Kosovë tha se dy persona të prekur nga virusi COVID-19 kanë humbur jetën të hënën në orët e hershme të mëngjesit.
Në një njoftim të ministrisë thuhet se në orën 3 vdiq një burrë nga Prishtina i lindur në vitin 1961 i cili vuante nga diabeti.
Ndërsa rreth orës 7 vdiq një grua nga fshati Korishë i komunës së Prizrenit e lindur në vitin 1950. Sipas ministrisë edhe ajo vuante nga disa sëmundje kronike.
Rastet e sotme e çuan në tre numrin e të vdekurve, Ditë më parë nga pasojat e virusit vdiq një 82 vjeçar nga komuna e Podujevës.
Deri të dielën mbrëma autoritetet kanë njoftuar se ka arritur ne 145 numri i të prekurve nga COVID-19 dhe prej tyre 23 janë shëruar.
Autoritetet po u bëjnë thirrje qytetarëve të respektojnë masat e vendosura në kuadër të përpjekjeve për pengimin e zgjerimit të koronavirusit. Ata thonë se tri javët e ardhshme pritet të jenë vendimtare në përballjen me pandeminë.
Facebook Forum