Udhëheqësit fetar në Kosovë dhe komandanti i forcave paqeruajtëse të NATO-s kanë bërë thirrje kundër çdo forme të ekstremizmit dhe dhunës.
Këto komente u bënë pas një takimi të përbashkët të kryetarit të Bashkësisë Islame të Kosovës, myftiut Naim Tërnava, Ipeshkvit të Kosovës, Dodë Gjergji, peshkopit të kishës ortodokse, Teodosije me komandantin e KFOR-ir, gjeneralin Salvatore Farina.
Në një komunikatë të lëshuar nga KFOR-i thuhet se udhëheqësit e komuniteteve fetare njohin të drejtën e të gjithë qytetarëve për ruajtjen e trashëgimisë së tyre kulturore e fetare dhe mbështesin bashkëjetesën paqësore ndërmjet besimeve të ndryshme.
“E dënojmë fuqishëm përdorimin e emrit të Zotit për të kryer vepra kriminale kundër njerëzimit. Besimi nuk duhet të përdoret kurrë si arsyetim për urrejtje e dhunë. Zoti është paqe. Pas debateve të ditëve të fundit mbi ekstremizmin fetar dhe radikalizmin, duam të nënvizojmë se prania e shumë komuniteteve fetare në rajon është pasuri për shoqërinë tonë”.
Në komunikatë thuhet se bashkësitë fetare janë miq të arsimimit shpirtëror që mësojnë të jetohet në paqe dhe duke respektuar dallimet.
“U bëjmë thirrje të gjithë besimtarëve tanë që të distancohen nga çdo formë e ekstremizmit ose dhunës për të mbështetur paqen për një të ardhme më të mirë për familjet tona dhe fëmijët tanë”, thuhet në komunikatë.
Takimi i udhëheqësve fetar me komandantin e KFOR-it, pasoi operacionin e kësaj jave gjatë të cilit u arrestuan 42 persona nën dyshimet për përfshirje në luftërat në Siri dhe Irak.
Operacioni i filluar të hënën ishte me i madhi deri tash pas shqetësimeve në rritje për shtimin e numrit të qytetarëve të Kosovës që po u bashkohen militantëve në Siri e Irak. Askush nuk e di numrin e saktë të tyre, por shërbimet e zbulimit pohojnë se janë disa qindra shqiptarë nga Kosova, Maqedonia e Shqipëria që mund të jenë duke luftuar në radhët e militantëve në lindjen e Mesme. Deri tash besohet se të paktën 16 qytetarë të Kosovës kanë humbur jetën në ato luftëra.