Lidhje

DnV: 18 komuna të Kosovës në raundin e dytë të zgjedhjeve


Në Kosovë po vazhdon numërimi i votave të zgjedhjeve të së dielës për pushtetin komunal.

Koalicioni i organizatave jo qeveritare, Demokracia në Veprim, e cila vëzhgoi zgjedhjet e së dielës publikoi rezultatet e saja paraprake, sipas të cilave njëzet komuna tashmë kanë zgjedhur kryetarët e tyre ndërsa 18 komuna pritet të shkojnë në raundin e dytë të votimeve që pritet të mbahet më 19 nëntor.

Zgjedhjet lokale të 22 tetorit, kanë qenë të vlefshme edhe për zgjedhjen e deputetëve të kuvendeve komunale.

Komisioni Qendror Zgjedhor bëri të ditur se rreth 44 për qind e rreth 1 milion e 890 mijë votuesve të regjistruar shfrytëzuan të drejtën e tyre për të votuar. Zyrtarët e këtij komisioni thanë se nuk ka pasur vështirësi në rrjedhën e procesit.

Konkurrenca më e fuqishme është zhvilluar në qytetet më të mëdha përfshirë Prishtinën ku Lëvizja Vetëvendosje pritet të shkojë në raundin e dyte më Lidhjen Demokratike të Kosovës.

Mbi 33 mijë vëzhgues të vendit por edhe ndërkombëtarë ndoqën procesin. Rreth 100 vëzhgues të Bashkimit Evropian qenë shpërndarë gjithandej Kosovës dhe sipas shefit të këtij misioni, Alojz Peterle procesi zgjedhor rrodhi i qetë përveç disa problemeve teknike.

86 prokurorë të Kosovës ishin përshirë në ditën e zgjedhjeve për të siguruar veprimet ligjore ndaj çdo përpjekjeje për keqpërdorimin e votës, ndërsa policia ë Kosovës u kujdes për të siguruar një proces të qetë.

Mbi 200 pjesëtarë të misionit në Kosovë të Organizatës për Siguri e Bashkëpunim në Evropë, ishin vendosur në pjesën veriore të Kosovës për të ndihmuar në mbarëvajtjen e procesit zgjedhor.

Sipas të dhënave të Komisionit Qendror të Zgjedhjeve, në komunat me shumicë serbe pati një pjesëmarrje më të lartë sesa në zonat tjera ndërsa sipas rezultateve paraprake të koalicionit Demokracia në Veprim, Lista Serbe është fituese në të dhjetë komunat me shumicë serbe.

Policia kishte hartuar një plan të veçantë për veriun për shkak të ndasive të thella politike që kishin nxitur incidente gjatë zgjedhjeve parlamentare të muajit qershor.

Pasdite policia tha se ka shkatërruar dy bomba dore që u zbuluan në një autobus i cili po udhëtonte nga Serbia në drejtim të Kosovës. Autobus me të cilin po udhëtonin votues serb u ndalua në vendkalimin kufitar verior ndërmjet të dyja vendeve ne Jarinjë. Policia arrestoi tre persona të përkatësisë kombëtare serbe po nuk dha më shumë hollësi rreth kësaj çështjeje.

Facebook Forum

XS
SM
MD
LG