Ambasadori amerikan në Kosovë, Greg Delawie, dënoi të mërkurën kërcënimet ndaj pjesëtarëve të Forcës së Sigurisë së Kosovës nga radhët e komunitetit serb.
Gjatë disa ditëve të fundit në komunën e Zubin Potokut, një nga tri komunat me shumicë serbe në veriun e Kosovës janë shpërndarë trakte nëpërmjet të cilave janë kërcënuar pjesëtarët serbë të Forcës së Sigurisë. Kërcënimi pasoi parakalimin e kësaj forcë në Prishtinë me rastin e dhjetë vjetorit të pavarësisë së Kosovës.
Traktet mbajnë emrin "Armata e Veriut", një grup për të cilin autoritetet thonë se nuk kanë njohuri, por kanë filluar hetimet. Në tekstin e kërcënimit thuhet se pjesëtarëve serbë të Forcës së Sigurisë "do t’ua thyejmë eshtrat”.
Ambasadori amerikan nëpërmjet një postimi në rrjetin social twitter bëri thirrje për hetimin e këtij rasti.
“Të gjithë qytetarët e Kosovës kanë të drejtë të jenë të sigurt derisa jetojnë jetën e tyre apo shkojnë në punë. Ne i dënojmë kërcënimet kundër pjesëtarëve të Forcës së Sigurisë së Kosovës në Zubin Potok dhe u bëjmë thirrje autoriteteve të hetojnë këtë rast. Ne mbështesim integrimin e serbëve të Kosovës në të gjitha institucionet e Kosovës”, shkroi ai.
Forca e Sigurisë së Kosovës u themelua në janar të vitit 2009 në bazë të planit të kryenegociatorit të Kombeve të Bashkuara, Martti Ahtisaari, në bazë të të cilit edhe është shpallur pavarësia e Kosovës. Forca e Sigurisë është forcë shumë-etnike me mbi 10 për qind të përbërjes së saj nga komunitetet jo shumicë.
Në pranverën e vitit të kaluar presidenti i Kosovës, Hashim Thaçi, hodhi nismën për ndryshimin e mandatit të Forcës së Sigurisë nëpërmjet një ligji duke nxitur reagimin e NATO-s dhe Shteteve të Bashkuara që kërkojnë krijimin e ushtrisë së Kosovës nëpërmjet ndryshimeve kushtetuese.
Por këto ndryshime varen nga vota e deputetëve të pakicave kombëtare dhe tash për tash duken të pamundura për shkak të qëndrimit kundërshtues të Beogradit dhe përfaqësuesve të serbëve të Kosovës ndaj themelimit të ushtrisë së saj.
Facebook Forum