Sot në Libi, forcat kryengritëse përparuan drejt portit lindor Brega, nga ku transportohet nafta, disa orë pasi me mbështetjen e sulmeve ajrore të koalicionit të vendeve perëndimore, morën përsëri kontrollin e qytetit Axhdabija në lindje të vendit. Ky është një qytet strategjik, me rezerva të pasura nafte, rreth 160 kilometra në jug të Bengazit, bazë e kryengritësve.
Banorët e festuan fitoren me kërcime nëpër rrugë dhe mbi tanke, me të shtëna armësh dhe duke u rënë borive të makinave. Forcat kryengritëse e patën humbur kontrollin e rajonit më tepër se një javë më parë, por sulmet ajrore të koalicionit kundër forcave qeveritare i ndihmuan ta rimarrin kontrollin e qytetit.
Në qytetin e Misratës, nën kontrollin e kryengritësve, pranë Tripolit, ka njoftime për goditje me predha nga forcat besnime të Moamar Gadafit, si dhe nga forcat e koalicionit.
Zyrtarët libianë ndërkohë po bëjnë përpjekje diplomatike për të zgjidhur krizën në vend, për të zgjidhur krizën që ka përfshirë vendin, ndërsa që forcat e koalicionit vazhdojnë të godasin objektivat pranë qendrave të kryengritësve.
Një delegacion që përfaqëson udhëheqësin libian Moamar Gadafi tha se qeveria është e gatshme të vërë në zbatim “hartën rrugore” të përvijuar nga Bashkimi Afrikan. Delegacioni lëshoi një deklaratë, pas një takimi me pesë vende të Afrikës në kryeqytetin e Etiopisë, Adis Adeba.