Policia maqedonase ka arrestuar tetë nga nëntë persona të akuzuar për shpërdorim të detyrës, larje parash dhe organizim me qëllime kriminale.
Një nga të akuzuarit ishte shef i çështjeve logjistike në Ministrinë e Mbrojtjes, ndërsa ka dhe biznesmenë, të cilët sipas prokurorisë maqedonase, kanë dëmtuar buxhetin e Maqedonisë për rreth dy milion e nëntëqind mijë dollarë amerikanë. Zyrari i lartë në Ministrinë e Mbrojtjës një kohë ishte në paraburgim dhe ai gjykohej në procesin së bashku me ish-ministrin e Mbrojtjes Vllado Buçkovski lidhur me shpërdorimin e parave për mirëmbajtjen e tankeve. Në mesin e të ndaluarve është edhe një ish-deputet i Lidhjes Social Demokrate, që së bashku me zyrtarin e Ministrisë së Mbrojtjes dhe biznesmenët akuzohen për marrjen e shumave të mëdha për servisin e helikopterëve, ndërkohë që organet e rendit thonë se të akuzuarit, i dërgonin paratë në një firmë në Hungari. Tre prej të akuzuarve u është caktuar paraburgimi prej tridhjetë ditësh, ndërsa të tjerëve u janë marrë dokumentet e udhëtimit.