Dhoma Amerikane e Tregtisë dhe bashkia e Tiranës organizuan sot një tryezë të rrumbullakët për të përmirësuar bashkëpunimin, si dhe për të shmangur vështirësitë dhe pengesat e bizneseve në këtë periudhë krize.
Përfaqësues të Dhomës amerikane kërkuan thjeshtimin e procedurave administrative, sepse ka një seri dokumentash që kërkohen për të paraqitur një kërkesë dhe një ankesë.
Po ashtu dokumentat që kërkohen për regjistrimin e një biznesi të ri janë të tepërta, mendon dhoma amerikane dhe një sërë dokumentash dhe procedurash mund të thjeshtohen.
Përfaqësuesit e bashkisë pohuan se po përpiqen të shtojnë transparencën dhe janë të hapur për të dëgjuar vërejtjet dhe për të ndryshuar gjendjen dhe bashkëpunimin me qarqet e biznesit.
Dhoma amerikane e tregtisë pohoi se ka pasaktësi në llogaritjet e taksave të pastrimit dhe të tabelës si dhe në taksën e re të arsimit.
Ato kërkuan që bizneset që janë në likujdim e sipër të mos detyrohen që të paguajnë taskat vendore, derisa kanë njoftuar se po mbyllen dhe nuk kanë veprimtari ekonomike.
Bashkia nga ana e saj shprehu gadishmërinë për të ndërtuar një dialog të vazhdueshëm për çdo procedurë dhe për çdo taksë të re, në mënyrë që të lehtësohet puna e gjithsecilit dhe të përmirësohet jeta në kryeqytet.
Shoqatat e tregtarëve dhe biznesit të vogël zhvilluan pak kohë më parë një seri protestash para bashkisë kundër taksave të rrritura të bashkisë. Ata pohuan se taksat u vendosën pa asnjë dialog me bizenset dhe se ato po i falimentonin.
Bizneset e vogla u ankuan edhe në gjykatë për këto taksa, me shpjegimin se ato ishin jashtë mundësive të tyre, ndërkohë që fitimet dhe konsumi kanë rënë në minimum.